侵侵失勢,我地香港侵 fans 要做嘅七件事

0
31

侵侵連任失敗,無數香港人震驚、失望、憤怒,擔心美國對中政策因此180度轉變,甚至不再Stand With Hong Kong,令香港係中共魔爪中永不翻身。

太平洋彼岸投票結束,主流傳媒都宣佈拜登入主白宮之時,我地呢班係香港嘅侵侵fans嘅仲可以做啲咩?至少有七樣,請大家一齊做:

一)回顧梓樂墮樓事件嘅始末,重新回顧每一個疑點:點解一開始會有警察係將軍澳放TG、警察何時進入停車場、有無阻礙救援,等等。今晚八點,為梓樂默哀一分鐘。

二)下星期就係理大圍城一周年。約埋三五知己,最好係本身唔留意呢件事嘅,搵日去睇《理大圍城》紀錄片、或者去中大保衞戰一周年,學生會搞嘅展覽。影意志影院 Ying E Chi Cinema 中大學生會 CUSU

三)留意TG Channel《被捕人士關注組》,睇下每日法庭時間表,搵日可以嘅,帶埋朋友去到旁聽席,向被捕嘅手足表達少少嘅支持。

四)拒絕就咁放棄12手足。就算可做嘅唔多,就即管去攞張膠卡係IG打個卡都好,提醒下身邊人,仍然有十二個港人被送中後歸期遙遙無期。12港人關注組

五)由自己身邊人做起,留意下家中兩老、年輕一代嘅小朋友,有冇睇TVB有冇食藍店有冇玩抖陰。可以嘅,就直接教育佢地黃藍觀念,就算唔得,都用婉轉嘅方法改變佢地,同佢地講喂間嘢好難食喎。

「喂喂喂!做乜唔關侵侵事嘅!」

因為我希望大家記得,係做一個侵侵fans之前,我地更加係一個香港人,呢個身份先最重要。

呢一刻身處香港、亦非美國公民嘅我地,就算再幾聲嘶力竭係連登為侵侵擊鼓鳴冤,對美國政制嘅影響都絕對有限。我地固然有千個理由去關注美國大選、去為結果感到憤怒,但更重要嘅係,我地今日立足香港,就有萬個理由去更加關注香港本土。

侵侵定拜登入主白宮,只係支線;我地嘅主線,唔係侵侵當選,係香港嘅民主同自由。係我地嘗試動搖太平洋彼岸嘅大選結果之前,我地做好份內事未?有冇每一日都盡力、撥最多可能嘅時間,去為自己增值、去影響身邊嘅香港人?正如我上一個Post所提及,中大同學搞個展覽都比校方多番施壓,都唔見社交媒體或連登有一樣大嘅回嚮去為佢地發聲﹐幾咁令人慨歎。

仲有太多可以做:

六)621、626、714、727、811、818、824、825、915、104:呢啲比較少人提起嘅日子,你又記唔記得呢一切值得守護嘅歷史、同埋發生過嘅警暴?

七)有冇去認識香港本土歷史?有冇多啲嘗試去支持本土文化、音樂、體育、藝術、電影,去抵擋中國嘅同化?陳健安啱啱嘅網上音樂會唱梁天琦係《地厚天高》中唱過嘅《十八》,好感人,你會唔會支持下?

八)美國演員 Joseph Gordon-Levitt 將香港嘅抗爭畫面剪輯成短片 “Hong Kong Never Sleeps”,你又有冇去睇下Share下,比更多身邊朋友記得我地走過嘅路?
等等。

到我地做好左本地戰線嘅每一部份,再去認真了解美國嘅政制同選舉制度,去爭取國際對香港嘅支持,先係最好嘅主次。

侵侵落選,好多朋友覺得彷如世界末日,覺得香港同世界都再冇未來。

但上年呢個時間,無數前線手足,企係AR15槍口前面、暢運道兩架水炮車兩架裝甲車前面,從來都未如此呼天搶地咁話「冇希望架啦!」,佢地只有做好自己嘅份內事,打好屬於香港人嘅仗。

與其嘗試改變美國,今日我地仍然企得係香港呢片土地上,我地就要打好眼前呢場,屬於「香港」嘅求生之戰。

作者 Facebook
 

发表评论