警方國安處今日 (20 日)拘捕青年組織賢學思政兩男一女成員，指控各人違反國安法第 23 條，國安處高級警司李桂華向傳媒交代案情時列舉了賢學思政的罪證，包括在街站發佈大量煽動仇恨政府、不服從法律及煽動分裂及顛覆政權信息，而「罪證」則包括勸止公眾使用安心出行、向在囚人士送物資，以及開設社區空間進行小買賣及展覽。以下是記者就各項指控提出的疑問及李桂華的回答。
記：其實開設一啲幫助在囚人士嘅平台點樣去違反到國安法呢？石牆花都有類似服務，國安處係咪都調查緊？
李：協助在囚士當然係冇問題，但係出於意圖做啲乜嘢，如果意圖係希望透過幫助一啲同佢信念相同嘅人，招攬一啲佢嘅追隨者、增加佢嘅影響力、意圖繼續違反國家安全嘅話，當然係有問題。至於其他機構會唔會接受我哋調查，我唔方便喺度透露。
* * * * *
記：警方係點樣判斷或者證明到，幫助一啲在囚人士有追隨者俾佢去招攬到呢？做一啲小買賣又係點樣證明到可以聚攬到一啲所謂追隨者呢？
李：做一個小買賣點樣能夠做一樣嘢？佢係一個策略，個策略就係有一個聚腳點，希望能夠吸引到一啲志同道合嘅人，一齊喺入面可以有個地方發展佢哋一啲興趣，從而提供一啲機會輸送佢哋自己嘅諗法，希望大家參加佢嘅行列。獄中嗰度，要睇番事實，最近都見到曾經有一個好嚴重嘅、喺監獄入面嘅事情，咁你都見到佢嘅影響力可以去到幾大。
記：你話賢學思政一啲展覽，睇番佢嘅展覽其實係一個睇書嘅展覽，其實畀人睇書嘅展覽係點樣構成犯法？同埋頭先你一路推論佢地用一啲物資吸引一啲志同道合嘅人去犯法，咁有冇實質嘅證據呢？如果市民去睇書或者幫手籌集一啲物資嘅話，會唔會都係犯法呢？
李：你將個問題擴大得好緊要，首先如果你頭先有聽到嘅話，應該我係咁講法嘅：佢哋係一個聚腳點，希望招攬到佢哋一啲志同道合嘅人，吸引佢上來喇，然之後將佢嘅意念大家去一個溝通，從而希望加入佢嘅團伙，呢個係比較準確嘅說法，絕對唔係話因為佢參加個讀書會就做到啲咁嘅嘢。逢係一個法律，包括咗我哋嘅香港國安法，有兩個最容易睇，第一個就係話你嗰個行為，第二要講個意圖，如果你個意圖係要來危害國家安全嘅話，當然有問題，如果唔係呢樣嘢，大家不需要過分擔心。
記：三個例子係幾時發生，包括疫情初期唔好用安心出行、光復香港口號，同埋下一次革命就係抗爭等等？點樣確定同證明呢個團體物資畀到相同信念嘅人呢，而嗰批在囚人士亦都完全跟隨番團體嘅做法？
李：安心出行係國安法之後出現嘅，所以我更加覺得佢係故意地違反我哋呢條國安法嘅。點樣睇到佢嘅意圖，其實你會從佢做出來嘅行為，同埋譬如佢宣揚嘅時候，佢想做啲咩嘢、呼籲啲咩嘢，已經睇到啲端倪，並非真係要見到佢煽惑好多人等等嘅嘢。如果第二時真係去到法院嘅話，我哋亦都係只需要證實佢曾經煽惑已經夠，唔需要證明佢係有人被煽惑。
