保護傘 — 點止黃店咁簡單 台灣手足嘅「新屋企」

0
30

【文:香港旅人 — 台灣流亡.海人】

自從嚟咗台灣,我就變咗個 gym 撚,因為我只能夠好努力鍛練強壯起嚟,加上好好讀書,做到身心健壯,照顧好自己,我先能夠繼續為信念奮鬥。老實講,依家香港咁嘅寒冬局勢,我哋依班真.香港人唯有好好活落去,保存好我哋嘅信念、記憶、共同體悲喜經歷,我哋先能夠重建我哋嘅香港家園。

好慚愧我係隻身嚟到台灣,為咗慳錢、又為咗增肌,先開始睇 YouTube 學煮飯,一啲好有心嘅家長又會好細心咁遙距教我點樣煮飯。不過我都淨係識煮一啲淡而無味嘅健身餐,差唔多樣樣飯餸都用台灣恩物「大同電鍋」嚟蒸熟,白飯、菜、雞胸肉就一餐。每日朝早起身整飯盒帶返學,放學做完 gym,再煮飯洗碗,真係好攰,慢慢明白到以前媽咪照顧自己嘅辛勞。

作者提供

後來為咗慳時間,就不停諗點樣更快煮飯,學點樣「鹽漬法」醃製嫩滑雞胸,蒸 20 分鐘搞掂。更甚者,《保護傘》老闆得知我自己煮就免費送食材俾我,已經煮熟嘅叉燒、燒肉,翻熱就食得,仲有菠蘿油、未炸西多做早餐,好多蔬菜均衡飲食,仲有免治豬肉俾我嘗試蒸肉餅,不知不覺解鎖咗好多煮法,又可以成日食返香港家鄉味 😋

住家肉餅

依段日子我成長咗好多,但有時亦會感觸,反而我無辦法煮一餐飯俾屋企人品嚐,無辦法再為佢哋洗碗做家務……希望總有一日可以喺「屋企」再為屋企人煮一餐飯、再食返媽咪煮嘅飯,目前為止就好感激台灣依邊保護傘嘅「新屋企人」每個星期都煲老火湯、又請我哋食返家鄉味道嘅飯餸,仲免費俾咁多食材我搞掂一日三餐。

(左)老闆煲嘅老火湯同「男人嘅浪漫」(右) 老闆做嘅港味燒賣

只可惜最近聽講,保護傘好難撐到年尾……依個消息實在晴天霹靂!老實講,保護傘真係幫咗好多台灣手足,簽出工作證俾就業手足,又個個月俾資助在學手足,仲俾出網店平台讓手足做代購,免費請手足食飯,仲有免費送食材,又唔介意我哋邊學邊做。

保護傘喺我心目中絕對係與手足同行、齊上齊落嘅黃店,而且勇敢承受好大嘅政治風險同壓力,我哋好多位手足都好信任佢哋。台灣有幾多間黃店可以做到依個地步,我哋手足們都心裡有數,亦好明白間間黃店都有佢哋經濟上同政治上嘅壓力同負擔。不過中国肺炎嘅影響實在太大,加上仆街港共政府處理疫情嘅低劣政治手段,以致台灣一直未能為香港旅遊解封通關……真係唔知道保護傘可唔可以捱到通關,俾各位真 ‧ 香港人嚟幫襯 😔😔😔

小弟我亦在此希望各位曾受保護傘幫助嘅台灣手足們,一齊各出奇謀,幫幫保護傘諗下點樣宣傳,吸引台灣本地人過嚟幫襯。我真心覺得,保護傘係「在臺.真香港人」重建海外家園嘅精神、雛型、圖騰,絕唔能夠消逝而四散,我相信香港人能夠堅持二零一九年以來展現嘅團結精神!

作者提供

 

作者 IG

(內文圖片由作者提供)