中秋夜,香港人連上獅子山嘅自由都被剝奪

0
381

今日適逢「國慶」疊正「中秋」,林鄭喺酒會上到大大聲講「國安法下,香港人依法享有基本法保障嘅權利同自由」;與此同時,香港人連上獅子山、行銅鑼灣嘅自由都被一班武裝份子剝奪,乾綱獨斷,當中無上訴嘅空間,無討論嘅餘地。

一條橙色嘅膠帶,一張以防疫為名嘅 599G 告票,就可以無視《香港人權法》、《國際公民及政治權利公約》所保障嘅人權自由。一夜之間,麥理浩徑第五段變咗禁地,基於邊條法律?進入者犯咗咩法?無,亦唔需要。「今日生日阿爺唔要見到有人搞串個 party!」就係唯一嘅行動綱領;橙色膠帶就係活生生、赤裸裸嘅紅線;紅線之外,更有無邊無際,自我設限嘅思想禁區。

係乜嘢賦予咗佢哋限制人民自由嘅權力?係無民意授權下立嘅法律,係強大嘅武裝部隊、軍國機器,仲有掌控住資源分配嘅權力,成為整個威權體制下嘅文攻武嚇。所謂「香港人依法享有嘅人權自由」只係極權批准下嘅活動空間;呢啲唔係自由,只係仰他人鼻息嘅苟且偷安。

自由嘅理念本來係與生俱來,每人有自由意志,有自由思想與行為,而自由嘅限界就係唔可以侵害到他人嘅權利。但係中共政權將自由嘅概念調轉,以法律之名,將自由變成一個被政權賦予嘅概念。好似駱惠寧講「愛國並唔係選擇」,所以香港人並無「不愛國」嘅自由。呢種將「與生俱來嘅權利」扭曲成「由上而下嘅恩賜」嘅管治概念,同中共解釋「一國兩制、高度自治」方式如出一轍:權力與自由都係由中共賦予,並沒有所謂嘅「剩餘自由」。呢個就係中共管治嘅本質。

與此同時,一班所謂悍衞香港法治嘅大法官,不發一言,全部噤聲;仲有嗰一班剛作出政治決定要留任立法會嘅「泛民」議員, 請履行你哋「延任」嘅承諾,悍衞香港人上獅子山嘅自由。

 

(標題為編輯所擬)