2020 年 11 月 12 日，是許智峯在立法會的最後一天。民主黨各人下月 1 日離任，他的辭職信則寫上「即時生效」。一眾議員曾表示，一起到議事廳交辭職信，但後來因各人計劃不同，最終各自處理。史上首次的「民主派議員總辭」，聲勢比想像中薄弱，也沒有甚麼眾志成城的大行動。許智峯說起時，則是一副「算啦都走啦」的淡然樣子，「無咩所謂啦」。
也確實，四年有多的這屆議會，議員做了多少工作，市民早看在眼裡，最後一天如何，似乎已不太重要。
＊＊＊＊＊
「有少少遺憾係，2016 年入嚟時，氣氛唔係咁，有啲民生政策 plan 好嘅，最後都無用。」他笑言，初進議會時其實是想做「環保鬥士」，「我係想將民主黨變成『綠黨』，想喺環境政策上面多啲著墨。你見我都逆民意，支持垃圾徵費，仲有單車友善政策呀，其實都寫好晒。」
他也寫好了私人草案去改革大學校委會，「未入議會前，睇住港大副校事件，點樣畀人玩（編按：2015 年，香港大學校務委員會否決任命遴選委員會推薦人選、法律學院前院長陳文敏為副校長）。其實校委條例用唔到政府資源，係可以用私人草案去做。」
初入議會其實想做「環保鬥士」
結果，反送中爆發，大民生也好，小政治也罷，政策討論統統讓路，議會內只餘下鬥爭一途，「其實都幾耿耿於懷，本身條例（私人草案）已經寫好。」
他說，反送中前，民主派議員仍能向政府進言，「政治無得傾，民生都仲會聽。施政報告前會見林鄭，財政預算案前會見財爺」、「後來，梁君彥見我企起身都已經想趕我出去啦。」
他也坦言，自己與無數香港人一樣，是因為反送中一役，才看清政府的「真面目」，「原來可以咁無恥」，「好似警方記者會講大話，以前真係諗唔到。」
到今天，政府已經不惜全面破壞制度，把議會的「裝飾」功能都放棄。作為由區議員出身，再進入立法會的典型政黨人，許智峯不無感慨，「反送中之後全面反枱，唔止無得傾，仲係要消滅你」、「可以想像到，政府以後都無底線，呢一刻（議會戰線）係無咗，我哋都要承認。」
從不認為自己是立法會一份子
他坦言，一直不認為自己是立法會的「一份子」，甚至覺得，由立法會大樓，同保安人員，都是制度暴力的一部分，「早上番到嚟，保安們對你恭恭敬敬打招呼，但嗰堆保安正正就係過去四年不斷抬你走、不斷幫政權做事，將我們民意代表趕出去。其實你好難興高采烈，同他們有禮貌打招呼，當然我都有，但我都只可恭敬地點個頭。」
在他的辦公室內，掛著一個眼罩、一個面罩。兩者都是與他「並肩作戰」，讓他站在前線監察警方執法的「戰友」。許智峯說，過去令他真正感受到，自己是議會戰線一員的，並非在富麗堂皇的議事廳，而是在街頭，「同市民一齊食椒、食催淚彈、水炮車……雖然我一個人擋唔到幾多，但起碼畀市民見到，代議士係同佢哋同一陣線。呢樣先係令我覺得最光榮、最驕傲。」
他也相信，這種「落手落腳」的態度，在未來離開議會後，仍然有意義，「就算我哋唔係議員，但市民見到我哋在另一崗位都無放棄，相信市民都唔會放棄。」
籲民主陣營放下競爭心態
因為「去留爭議」，民主陣營深陷分裂，即使民主派議員最後仍選擇撤出議會，但外界評價仍是毀多於譽。作為傳統民主派中的「衝衝子」，網民的口誅筆伐，對許智峯仍留有餘地。
「抗爭派」和「傳統民主派」間的矛盾，他清楚不過。「坦白講，之前爭拗係大。」他認為在已沒有議會的今天，香港更需要的是公民社會，「要拉番起一個最強大嘅公民戰線。」而他眼中的公民戰線，各方陣營都應包括在內，「既然而家大家都總辭了，大家都係香港人，我覺得比以前多咗好多空間去傾。」
「既然大家都有爭取民主自由嘅共同目標，喺打壓咁嚴重嘅世代，我哋都要放低互相係競爭者嘅心態，大家要放下，槍口一致對外對抗專制暴政」、「呢個這訊息好重要，要畀不同派別、光譜知道。」
政治清算不會結束 「都預咗」
在民主派離任的記者會上，有議員公開感謝家人。許智峯當時沒有說甚麼，但坐下細談，說起這幾年來有負的人，還是要談起家人，和議辦手足。
「呢 4 年（家人）真係擔驚受怕得好緊要。太太同小朋友，無論出面幾風大雨大，番到去就好似差到電咁。時勢咁艱難都不離不棄，真係幾感動，嚟緊要陪佢哋多啲。」
「仲要多謝出面一班同事，真係出生入死。而家出面經濟咁難，都希望盡量畀佢哋做多一個月，慢慢搵工。」
他說想要陪小朋友踏單車，「佢踩，我喺後面跑」，但他也知道，政治清算，不會隨著辭任而結束，「預期更近嘅係刑事檢控…可能腐爛植物一事，都會刑事追究」。
「我都預咗面對，係沉重嘅，但都預咗。兵來將擋，未必告得入嘅。」
採訪、撰文｜丁喬、劉偉程
攝影｜Kenji Wong
