噚日歐洲凌晨時間，又傳出警察上門拉人，指 9 人「協助逃犯」，分明想轉移視線，用大清算大搜捕恐嚇家屬。
唔知由幾時開始，我睇住身邊嘅人，一個接著一個被捕、一個接著一個上庭、一個接著一個坐監、一個接著一個流亡，一個接著一個响我生命入面消失。每次有認識嘅人出事，我都會喊住回溯到底對上一次見面係幾時、邊度，又做咗啲咩 — 今次係高院門口食煙，講緊啲好無聊嘅嘢，然後話食飯食飯，但冇約到。唔知係幾時開始，我對「光復香港」嘅想像，由想像「之後要點生活做啲咩」變成「只係想齊齊整整」，我只係想唔再需要感受呢種深深嘅無力同愧疚。
細個有人教我，消除無力感得一個方法，就係「去做」，做好手頭上嘅每一件事，起碼你冇浪費到任何一個機會，無浪費自己仲有得揀嘅自由。
你今日做咗啲咩選擇？有冇好好 honour 自己僅餘嘅自由？有冇去感謝黃店，有冇簽聯署，有冇去聽審，有冇去做你手頭上每一件可以做到嘅事？你仲有得揀，有啲人已經冇得揀。我每一日都咁樣問自己。
本來入紙發起聯署時，未有 12 人嘅事，聯署單純只係希望向中共施壓，製造啲麻煩畀佢。但而家我知道，聽證會可能係第一個機會促使國際社會採取具體行動向中共施壓，就算未能營救，都盡可能間接地保護 12 港人、9 位手足同家屬、飛行服務隊嘅 whistleblower。國際上對於佢哋嘅關心越多，佢哋就越安全。我哋只需要用 VPN 填張 form，已經喺一個相對安全嘅環境支援緊呢一刻面對緊人身安全風險嘅手足同家屬。
就算香港警察繼續拉人滅聲，或者騷擾同恐嚇家屬，隱瞞佢哋儲心積累部署將 12 人送中，我都會去將真相講返出嚟。不論係聽證會、遊說定係其他嘅場合，我都一定要將個真相講出嚟。呢個係我唯一可以做到嘅嘢，亦都係我一定要做到嘅嘢。
繼續努力。
作者 Facebook
