47 名參與或組織民主派初選的人士，被落案以《國安法》控告，經過 4 日「馬拉松式」審訊後，當中 15 名被告獲國安法指定法官、總裁判官蘇惠德批准保釋，但律政司隨即提出覆核，本身獲保釋的被告亦須還押，待 48 小時內由高等法院再處理保釋聆訊。換言之，47 人今晚沒有一個能與家人、朋友團聚。
一個也沒有。
眾被告的親友在獲悉情況後，有人情緒激動，泣不成聲；有人憤恨交加，形容律政司是「賤種」；亦有人表現冷靜，說對結果毫不意外，並呼籲家屬要團結在一起，勸勉香港人要繼續支持眾被告。
《立場》輯錄眾家屬、親友在庭外的說話，在此一一呈現。四日來只能隔著螢幕看望自己的挈愛，即使法官首肯，仍被律政司一刀斬斷希望。他們思念的聲音，我們都有義務聆聽。
＊＊＊＊＊
【劉頴匡女友 Emilia Wong】
呢啲（保釋）條件已經係非常嚴苛、苛刻，基本上被告、政治犯要遵守呢啲保釋條件，實際上我覺得佢哋等如社會性死亡，根本上佢哋唔會喺公共領域上存在，基本上等於唔再存在社會咁滯。
究竟呢個政權怕啲咩呀？怕啲死人會危害國家安全？我重申呢啲保釋條件，已經嚴苛到社會性死亡咁滯，都唔可以畀佢哋去保釋，見吓屋企人…去到咩情況下要驚呢啲社會性死亡嘅人，仲要本身原本 15 個法官批准保釋，（律政司）立刻做呢啲政治性決定，嗰 15 位保釋嘅朋友、政治犯，立刻要再還柙，究竟有咩要咁怕呢？
我唔覺得係一個法律程序，咁多日所謂法庭程序，我角度係大家夾埋演咗一場戲。根本係預先寫好劇本，各位大律師陳詞我全部聽晒，我覺得好有道理，全部好認真去準備，但係結果又如何？對於可能話事嘅人來講都係一場戲，等你講晒，等你冇藉口話我唔畀你講，然後繼續維持原本決定，所以你話遲吓上訴有冇信心，我唔會夠膽寄予任何厚望，因為只係一場戲。
大家撐住，都冇乜嘢可以講，大家約定喺自己崗位撐住自己，撐住身邊嘅人。
＊＊＊＊＊
【呂智恆養母 Elsa】
我話畀共產黨聽，你所做嘅嘢係錯嘅！終有一日落到地獄，你哋就會被活火燒，上帝返來時，佢審判，你哋一定，如果唔悔改認罪，你一定受到報應，所有陷害我哋香港班忠良嘅人。
呢 47 個人，全部都係為我哋香港，而家被呢個政權，將我哋香港搞壞咗，令到香港好腐敗，我哋唔會畀佢得逞，我哋會繼續堅持，會做真理嘅嘢，我哋呢班人，秉承上帝嘅有愛、有公義，佢哋呢班邪惡嘅人，一定會得到報應……
（想同呂智恆講），撐住喇，神與你同在。我哋係基督徒，我哋就係要背負十字架，要有犧牲嘅精神，所以我哋係唔驚，不過我哋係痛心，因為我哋同伴受苦，我哋一班弟兄姊妹，每個人都有呢個心智。咩叫信耶穌？信耶穌就係被釘十字架，為我哋嘅罪而死，呢個係犧牲精神，我哋係有愛、有公義，仍然要保持。
我當然好痛心，雖然佢唔係我親生，因為我都帶大佢十幾年，因為佢細個嗰時，已經係受到好多虐待，周圍住過晒，周圍畀人哋凑。佢歲幾，爹哋媽咪分開咗，我慢慢好好咁，畀好多耐性、愛心湊大佢，雖然佢一個年輕人，青少年時心智好反叛，但佢知道自己態度唔好，會道歉、會改，呢個就係我哋一家人，我先生、我好好咁樣教導佢（的結果）。佢係一個良好嘅青年，係有愛，同尋求公義嘅，我以佢為榮。
我好傷心，但我會繼續堅持，會行一條正義嘅路，唔會因為呢個腐敗嘅政權，要令我哋香港人個醜惡，完全行出來。而家點解我哋咁唔鍾意中國大陸，唔鍾意啲人，就係劣質，人嗰個黑暗面全部走晒出嚟，喺中國大陸嘅制度裡面。
我哋喺香港，有一個良好嘅制度，我哋可以將人嘅美善呈現得好好，我哋係要追求呢樣野。雖然我哋都知道，中國大陸亦有好人，佢哋嘅美善好好，但係唔夠，我哋喺香港，一定要保持，我哋要將我哋香港人，個制度畀我哋嘅美善傳承落去。
＊＊＊＊＊
【梁國雄太太陳寶瑩】
今日嘅審訊結果係一啲都唔出奇，係預料之內。好多傳媒朋友前幾日都問我，樂唔樂觀，我就話唔樂觀，事實上亦都係咁樣。因為我哋知道，而家國安法立咗之後，成個香港嘅司法制度已經完全扭曲、顛倒晒。今日個上庭係為咗保釋，保釋嘅，過去司法制度就係，個官認為會違反保釋條件，或者有潛逃風險，先至唔畀人保釋。
但國安法已經講咗，要更高嘅門檻，就係要個官信納，嗰啲人唔會繼續違反法例，先至畀得保釋佢。而且大家睇到，今日所有嘅被告，全部都接受嚴苛嘅保釋條件，但係，有部分嘅被告係冇得保釋，而其他嗰啲，雖然係保釋咗，但立即又要畀律政司去覆核判決。
我哋睇到，成個保釋制度，已經完全扭曲咗。另一方面，喺法庭裡面，我哋見到律師代表，好清楚咁講到，今次嘅罪，律政司提供嘅材料係不足夠，材料係非常薄弱，但係，要令到被告還柙三個月，係非常之唔合理，係完全係唔合比例、嚴苛嘅裁決。
但係喺咁清楚嘅理據之下，法官都係無接納呢種觀點，令我哋非常失望。係進一步證實到，而家嘅司法制度，喺國安法之下，係完全無言論嘅保障，完全無埋。我想提一點，好多被告，佢哋都願意接受啲嚴苛嘅條件，寧願犧牲自己嘅言論自由，但係法官都係唔會接受，根本上，我對於未來嘅審訊，都係毫不樂觀。
＊＊＊＊＊
【朱凱廸太太區佩芬】
呢個係一班改變香港，改變香港政治，亦改變香港現狀嘅一個…香港去一個倒退嘅政治現狀，倒退我哋言論自由嘅重要案件，我希望世界各地，亦希望香港人一齊繼續關注。
作為一個家屬，我就好希望，我哋除咗傷心、憤怒，我哋要堅強，除咗我哋自己堅強，我哋嘅丈夫，我哋嘅妻子，我哋嘅仔女，我哋嘅學生，我哋嘅朋友，喺收押所裡面嘅人嘅朋友，全部都要繼續好堅強。
我哋而家係同坐一條船，我哋希望可以同舟共濟，我哋家屬都係，我哋希望我哋可以互相扶持，亦都希望可以得到香港人嘅支持。多謝大家。
＊＊＊＊＊
【岑敖暉太太余思朗】
首先想多謝，呢幾日來聲援嘅人士，各位家屬，同埋各位辛苦咗好多日嘅傳媒朋友，辛苦晒大家。
以下我想代表岑敖暉家屬講幾句：
關於保釋申請嘅結果，我哋一早有心理準備會遭到拒絕，當然結果出來後，依然係好傷心，但係我哋會就今次嘅保釋拒絕申請，上訴到高等法院。
雖然頭先裁判官批准咗 15 名被告可以獲准保釋，但律政司馬上提出覆核，並且要求扣押所有被告，我認為個結果係極度、非常嚴苛，係唔合理。警方係提早咗個幾月進行拘捕，將 47 名被告全部帶上法庭，進行 4 日審訊，期間禁止任何家屬去一庭旁聽，呢個係我哋權利，但係我哋無。各被告 4 日審訊以來，係無見過、完全無見過自己嘅親人，就算佢嘅親人日日來旁聽，佢都無見到佢。
剛才裁判官講到，傳媒唔可以報道審訊嘅內容，即使呢件事，即使國安法關乎重大嘅公眾利益，都係唔可以報道。另外，喺法庭外明明有電視，但係電視冇進行任何轉播，庭外嘅人完全唔知發生咩事，只係喺度齋等，令人相當懷疑，喺呢條國安法之下，會唔會有進行秘密審訊嘅可能性。
今次嘅審訊，資訊係非常唔流通，我哋認為咁樣非常唔合理、唔公平。另外，控方而家係要求，將審訊押後成 3 個月，去進行搜證，對所有被告，同所有被告家屬來講，都係非常唔合理，唔合比例，同唔公平，我喺度表示，我係非常傷心同憤怒。
最後想呼籲大家，繼續支持佢哋。香港加油，香港人加油！
＊＊＊＊＊
【岑子杰戰友、民陣召集人陳皓桓】
就住今日，律政司司長，就住法官批出保釋都提出覆核，民間人權陣線認為呢個政府，簡直失去人性。呢幾日嘅審訊，折磨緊所有被告、家屬、朋友，再折磨緊爭取民主嘅香港人。但係民陣呼籲大家，唔好放棄爭取民主自由，呢個係我哋嘅底線。正如被告離開法庭嘅時候，佢哋大叫，香港人加油，撐住，我希望大家都能做到。
由國安法拘捕民主派領袖，到今日改變選舉制度，呢個係一個政變，係顛覆緊人民選擇。
我想補充，啲被告，佢哋見到大家嘅聲援，呢幾日入面，佢哋係覺得鼓舞。透過報紙、新聞，見到大家，凌晨排隊，去支持聲援佢哋，佢哋係覺得鼓舞。
＊＊＊＊＊
【梁國雄多年好友、社民連主席吳文遠】
我只有兩個字形容律政司呢個行為，賤種！
對 47 位被告，過去一星期所受折磨，本身已經係一條不公義罪行，個個家屬每日都提心吊膽。去到有 15 位被告同家屬，因為蘇官嘅決定，有 30 秒希望…就畀律政司一嘢掃落去。
