我喺篇文講咗，肥佬黎私下支持邊個，佢完全有自由，重點係佢作為一個美國人都關注嘅香港民主運動代表人物，用個人身份公開表態就不智。
請睇返，佢係喺自己開宗明義要嚟打國際線嘅 Twitter acc 用英文咁樣講。《蘋果》本身寫乜，美國人唔識中文，尤其係廣東話，鬼理咩，但你 Twitter 公開咁講，仲要俾人踢爆你出錢搵拜登黑材料，唔係淨係轉載美國報道，係自己親身涉足人地黨爭，咁就完全唔同囉。
The way mainstream media covers up Hunter Biden scandal epitomizes what America will become, if Biden wins – a shield of hypocrisy, a country out of touch with reality.
可能香港網民覺得肥佬黎同《蘋果》唔係咁大啫，需知道當日佢被捕係全部西媒用突發頭條報道，多個西方政客 Twitter 回應，甚至以前佢去美國都已經可以又見彭斯又見佩洛西，佢喺美國係被當成黃之鋒甚至可能更高級的。咁嘅人，講嘢唔係要小心？
美國人會唔會咁計較？你睇昂山素姬，上台後縱容軍方搞羅興亞人，依家被西媒當戰犯同要求褫奪和平獎。又比喻，如果達賴突然發癲爆粗鬧美國自由派道德淪亡，你估會唔會即刻支持西藏嘅人少一半？當然咁比突兀，但肥老黎在西方眼中（重點唔係香港人眼中），係香港咁上下嘅代表性人物。
同其他傳媒比係比唔到。《蘋果》係香港唯一民主大報，同埋上面講咗，肥佬黎係西媒眼中香港民主象徵。咩其他報夠表態，份報紙本身地位唔同嘛。唔通你話周浩鼎同朱凱廸都係垃圾會議員，所以講嘢效果就一樣？朱西伯格係 IT 人，陳易希都係 IT 人，所以就一樣？
敖卓軒有諗法反而細啲，因為佢唔出名唔會上新聞嘛，同埋佢只係團隊其中一人。依家肥佬黎，雖然唔算好大單，但的確好多國際傳媒有出報道，自己 Google 吓，邊個影響大啲？同埋敖卓軒唔係正式 lobbyist，lobbyist 在美國係個正式職業，受規管要攞牌的，可以維基 Honest Leadership and Open Government Act 睇吓有幾多規矩，佢只係學餘做咁上下嘢。同埋都係嗰句，兩個人象徵性完全唔同囉。
最後，係咪香港只係中美大戰一細部分，香港人做咩唔會有影響？咁講抗爭者就全部收工返屋企等運到就得啦。的確，大方向，會唔會幫香港，係受個主旋律帶動的。但會幫幾多，出咩招數，傳媒報道，會唔會造成輿論關注同壓力，香港人係可以影響。《香港人權民主法》通過，都係因為理大圍城美媒不分晝夜報道，先逼到共和黨參議院領袖 McConnell 支持通過（眾議院 10 月 15 日通過初版，參議院 11 月 19 日先通過）。
所以唔係等運到。香港人做事外國人係會睇，尤其重點人物係真係有潛在影響。西方就李漢奸、肥佬黎、黃 GPhone。最後一個大家都必須承認的例子，一拉周庭就全日本轟動，成個勢唔同哂。所以依啲重點人物係要小心言行的。
（標題為編輯所擬）
作者 Facebook
