鍾劍華,你仲想兜啲乜?

0
30

嘈咗成個幾月,非建制派嘅所謂去留問題,終於塵埃落定。一早話明唔留任嘅朱凱迪同陳志全,結果真係唔留任。至於話過會跟民調結果決定去留嘅 15 名泛民議員,則係除咗陳淑莊以個人理由唔留任兼退黨外,全部決定留任。可以話,呢十四人嘅留任,唔單只係整衰咗自己個名,連帶鍾庭耀建立嘅「香港民意研究所」,都被佢哋破壞咗公信力。

因此,鍾劍華作為「香港民意研究所」副行政總裁,先至要喺網上寫文,話要對去留民調進行說明同澄清,但係佢寫到水蛇春咁長,似乎都仲未意識到今次民調嘅真正問題,就係其他人信唔信佢哋能夠保持中立嘅問題。其實,一個民調機構嘅中立性,往往同佢嘅公信力成正比。過去鍾庭耀嘅民調有公信力,除咗有港大呢個招牌外,佢自己本身無自己落場玩政治,其實都係一個重要因素。

之但係去到今次,無論鍾庭耀定係鍾劍華,都被人覺得佢係偏幫主留派。先唔好講鍾劍華成日跳出來做政治表態,鍾庭耀本來就唔應該參與所謂嘅「去留門檻」設定同討論,因為「去留門檻」呢樣嘢,本身就係一項政治決定,佢自己加埋入去傾的話,人哋就會覺得你唔中立。

所以,究竟委託人應該以所有受訪者、以自認係泛民支持者,定係自認係委託人支持者嘅意向決定去留,乃至係係用過半定三分之二支持決定去留,呢啲咁嘅「去留門檻」問題,本來就應該由返 15 個泛民議員自己決定,香港民研只負責做訪問同統計,先至正路。

如果好似而家咁,明明之前已經做過民調,顯示非建制派支持者反對留任佔多,鍾劍華仲去提啲乜嘢「雙門檻」,鍾庭耀仲去提啲乜嘢委託人支持者嘅意見先算數,你又點能夠怪人覺得你哋本身係偏幫主留派,所以先會出盡計仔幫佢哋整靚盤數啫?你明明係裁判,人家想點整越位陷阱,究竟關你鬼事咩?

正因為咁,見到鍾劍華仲喺篇文為所謂嘅「雙門檻」死兜,話乜嘢三分之二可以係同意佢哋留先留,亦可以喺反對佢哋走先走,嗰一刻就真係唔知好嬲定好笑。先唔講所謂「雙門檻」,所謂「委託人嘅支持者意見先有約束力」,究竟係咪偏幫主留派,由始至終嘅問題係:你哋作為民調機構,幫泛民班議員諗「去留門檻」,本身就係越俎代庖吖嘛?

至於鍾劍華話民調結果顯示,建制派支持者最想泛民總辭,但佢應該知道,藍絲意見係一回事,建制派班政客、中環、西環或者北京點諗,又係另一回事。既然係咁,鍾劍華又憑乜認為批評佢哋嘅人,係同建制派一個鼻孔出氣先?話唔定建制派最想嘅,就係好似泛民而家咁樣,搬完龍門民調都係唔夠數撐留任,但係結果都係決定留任呢?如果泛民好似朱凱迪同慢必咁灑脫的話,建制派又邊處有水抽啫?

发表评论