香港淪陷，港大亦必然會淪陷，只係我冇諗得咁快。
今日，眾新聞等多家媒體報導，港大將有兩名清華大學「學者」加入管理層任副校長，作張翔嘅左右手，當中將會主掌研究嘅申作軍，現時更加係黨委委員。係黨委委員正式明目張膽入主香港最高學府嘅今日，我諗起左三年前嘅嗰位「下任校長大熱」。
每一個醫學院同學都必定記得，三年前，我地醫學院有一連串極其盛大嘅慶祝活動，紀念醫學院成立130周年，又拍紀錄片、又出左好多本書、又日日有唔同嘅學際或社交活動，最後以一場係會展、接近大半個香港醫學界聚首一堂嘅巨型典禮作結。
而嗰時全世界嘅講法都係，130 周年呢一場驚天地泣鬼神嘅盛會，係梁卓偉競選港大校長嘅選舉Campaign，用黎展顯佢過人嘅決策、執作、領導能力。
可惜即使佢將醫學院 130 周年嘅大日子搞到有聲有色；偏偏就係最後嘅盛大典禮前兩日，傳出消息，由李國章主持嘅校委會揀左一個名不經傳嘅張翔，做港大之首。結果典禮當晚，無數人係背後談論梁卓偉嘅「落選」，有人婉惜，亦當然有人嘲諷。
其實，Dean Leung 可以話就係最典型嘅香港人，一個「世界仔」。可惜，現今香港，原來再容不下一個咁嘅「香港仔」身處權力高位。
*** ***
Dean Leung 係好多香港成功人仕嘅樣板。香港出生，畢業於香港華仁書院，再到海外升學。哈佛碩士、港大醫學博士嘅佢，多年前洞察到公共衛生將會係大有發展潛力嘅範疇，放棄做傳統最尊貴嘅專科，投身公共衛生，結果成為呢一個範疇頂尖中嘅頂尖。講眼光，佢絕不缺少。唔係出身於咩傳統醫學世家，但憑住自己嘅成就，係41歲成為港大醫學院史上最年輕嘅院長，絕對有佢嘅過人之處。
佢醫術唔係最高明，但佢嘅行政能力、政治手腕，絕對厲害。2008年，任職首任食衞局副局長，亦係當時巿民最為熟識嘅副局者之一。2011 年，成為特首辦主任，係醫學外，去到官場，一樣咁成功。
講政治立場？你永遠都捉唔透呢個人想點。佢就係最典型的香港人，左右逢源、「唔識政治」、永遠就係耍官腔去迴避最具火藥性嘅政治炸彈，然後返去佢擅長嘅工作層面，用個人實力去一步步爬升。如果係舊時嗰個美好嘅香港，做公務員唔使宣誓效忠特區政府，做老師唔使因為自己嘅政見唔跟主旋律起舞而被梁振英批鬥，梁卓偉呢種有實力嘅世界仔，必定仕途暢順，就好似十幾年前嘅佢一樣。
偏偏黎到今日，政治掛師嘅當權者已經扯破畫皮，擺明車馬係要將根正苗紅嘅中國人、黨委委員、紅色勢力，放到香港每一個權力核心。佢地唔再修飾，極其醜陋咁話比世界知，現今香港，上位唔係講實力唔係講往績，係講你夠唔夠忠君愛黨。而梁卓偉呢個唔願徹底歸邊嘅「世界仔」，就成為呢個大潮流之中嘅犧牲者。
*** ***
或者佢同每一個香港打工仔一樣，少不免會擦下鞋，會同更高權力嘅人打好關係，但佢亦有一條自己嘅良知底線。大家或者會笑佢為左做政府專家、和應政府政策而講戴口罩講唔到嘢，但係呢個群魔亂舞嘅時代，佢有冇半句說話真係背棄良知？有冇出過黎「讉責暴徒、支持政府依法執政」，有冇加入數百名藍絲醫生聯署支持警察嚴正執法？冇。
以佢嘅能力同往績，只要佢再放棄多一點 Integrity、放棄多一點良知，學某啲日日吹捧大灣區發展機遇、日日話心繫祖國要上武漢抗疫嘅某醫學教授咁媚共法，可能李國章一早已經將港大校長之位交左比佢了。
偏偏，今日上位嘅，係張翔，係申作軍同志。
香港真係墮落得太快。可以預想到有人睇完以上，會咁諗：「連痴埋政府嘅梁卓偉都可以吹奏，真係荒謬」，而呢個某程度上都係事實。
梁卓偉絕對唔係大家希望支持嘅「黃絲」、「手足」；政見上，或者佢都未必係我地嘅同路人。可能，佢只係一個中立 L，一個騎牆派，但至少佢都算係一個有良知嘅騎牆派。佢唔係因為勇敢發聲反對政府、聲援抗爭而無法上位，而只係因為一丁點嘅良知、未行到最紅最紅，未做到最忠誠的狗，都要輸比黨員們，就知香港差到一個點嘅地步。哀我港大，哀我香港。
*** ***
但即使如此，我地仍然要慶幸，呢個世界仍然有咁樣嘅人。係國安法時代，白色恐怖時代，我地不能奢望每一個人都有捨身成仁嘅勇氣，不能要求每一個人都願意放棄一切權同勢，不能期望每一個人都係黎青龍教授一般嘅巨人。但我地依然可以相信，大部份嘅香港人，如 Dean Leung 一樣，或者「世界仔」、或者滑頭、或者偶而擦鞋，但係大是大非面前，仍然不忘有啲良知嘅底線仍要堅守，然後係適當嘅時候做可以做嘅事、或者不做某啲事。容我好天真講句，只要每人都守住呢條底線，即使世界再壞，都不會壞到透頂。
作者 Facebook
