6.12 兩周年反思:勿輕易判斷他人、拉闊國際想像、唔好鬥黃

0
420

612,兩週年。回憶,好多人寫咗。志氣 bite,好多人講咗。

反思,對前路展望,同樣需要。我有三點想講。

1. 首先,想講無知同謙卑。

1.1 嚟到呢個階段,打壓越嚟越嚴重,所以好多人同事會必然變得地下化。

1.2 地下化的後果,就係好多事情變得不能明言。可能坐響你對面嗰個人,坐過監,又或者隨時會俾人拉去坐監。你唔會知,因為佢唔會無端端同你講。

1.3 如是者,第一個需要嘅改變,係唔好對任何人同事輕易作出任何判斷。

1.4 無大台,人人都是參與者,大家慣咗有嗰句講嗰句。但時勢改變,唔收口,會傷害人。特別係人人都受過傷,你又唔知人哋受過幾大傷,唔覺意可能插咗人一刀。講好齊上齊落,就要收口,認清自己可能的無知,然後謙卑。

1.5 呢樣嘢我知道好違反網上特別係 KOL 邏輯。有啲人去到呢個時勢都仲吓吓聲大大同你講佢幾勁的話,唯有避開佢,唔好跟紅頂白一齊唱,已經功德無量。

1.6 一個好實際嘅應用:今時今日,唔好問人諗唔諗住走。可能人哋搞緊,但唔知搞唔搞得成,又或者未公開得,又或者想走走唔到 ⋯ 你隨口問一句,同迫人講大話冇乜分別。

1.7 同樣道理,家家有本難諗的經,唔好隨意判斷人哋走同留嘅決定,以及相關的掙扎,呢點應該係 2021 年香港人嘅基本禮儀。可能人哋都掙扎得好辛苦,但係佢冇可能亦冇責任解俾你聽。

1.8 你可以做嘅,係睇吓有咩實際嘅嘢幫手(咦呢張表我填過我教你填啦),而唔係對人本身作出判斷(嘩你咁都驚話要走乜你咁無骨氣)。

*  *  *

2. 第二點,係思考要拉闊,特別係國際想像。

2.1 去到今日,我諗冇人會再覺得香港嘅問題只源於香港境內,亦唔可能以為搵個安全套笠住香港就可以一勞永逸偏安一角。香港嘅苦難,係人類文明去到呢個位,好多好多個力量交集而成,香港咁橋成為咗一個觸發點。你可以話係香港嘅不幸,但反過嚟睇亦可以話香港好彩。

2.2 因為香港嘅問題唔係純粹香港嘅事,所以單純地諗「贏返香港」而唔去諗各種超越香港嘅力量,有少少不切實際。

2.3 呢個覺悟會引伸出兩點。首先,我哋愛香港,但我哋唔可能純粹香港本位咁樣去睇呢個世界:直接幫到香港嘅就恩人,唔直接幫嘅就仇人,總之香港最慘,要成個世界圍住香港轉 ⋯ 不,咁樣諗唔單止冇幫助,亦都對應唔到香港所處的現實。

2.4 反過嚟,如果我哋肯反轉嚟睇,呢個世界上面任何對專制嘅反抗,其實都係某程度上為未來香港的重生提供土壤。至於咩為之專制,咩為之反抗,要以當時當地的脈絡去理解,我哋唔可以假設自己一眼就見到,唔會有人咁叻。過咗呢個心理關口,香港人,無論響香港定響其他地方,都大把嘢值得做。

2.5 同一道理,響香港都一樣。香港本身都有好多其他問題,有壓迫,有反抗。串連呢啲反抗,就算佢哋表面上好似同場運動冇直接關係,亦都重要。重複多一次:我哋面對嘅係一張棉棉密密嘅網,冇話打贏一個終極大佬就會爆機,我哋要先離開呢種想法。

*  *  *

3. 第三點,係綜合上面兩點,去講一講付出。

3.1 因為大家都唔知大家背負住幾多,所以大家都唔應該批判對方付出咗幾多。換言之:唔好鬥黃。

3.2 你覺得有人更值得大家嘅支持,你咪講出嚟囉;但咁唔等同批評另一個人唔值得大家嘅支持。一個正、一個反,我估大家識得分。

3.3 亦因為大家都唔知大家背負幾多,所以其實真係要主動啲關心鎂光燈以外嘅人:無論響香港定外地。坐緊嘅、坐完嘅、流亡嘅、走唔到嘅 ⋯ 一諗到呢啲位,就知道仲有大把嘢要做。世界大局一時三刻未必改變到,但讓已經付出的人感到受尊重,呢點好實在可以做得出影響。

3.4 人有情緒,好正常。不過情緒亦有後面的邏輯,好多人會想辦法挑動,左右我哋嘅思考。要諗得闊一啲,有時就要拋開即時嘅情緒,退後一步睇。

3.5 例如當你見到一個受害者,你當然可以選擇翻箱倒籠睇吓佢以前有冇幫過你,先決定你要幫佢定恥笑佢。但係如果你係純粹目標為本,你就唔會諗咁多。你只會諗,好簡單,多一個盟友,好過多一個敵人。盡可能爭取所有可以爭取的對像,團結大多數,分化孤立打擊一小撮,毛澤東這個思考高度到今日仍然適用。

3.6 呢種包容嘅能力,都係一種付出。鬥黃的問題,是把付出的思考限制,然後以量比併,鬥慘。但是這個世界明明無限複雜;付出,應該有好多種,而且越多越好。

兩年了,大家都付出咗好多,唔易。為咗令呢啲付出唔好白費,互相創造一個良好嘅環境大家一齊捱落去,至關重要。以上少少諗法,我都唔肯定自己無時無刻都做得到,不過起碼可以當個目標。

 

原文刊於作者 facebook;標題由編輯所擬