區議員宣誓修例昨（21 日）生效，面對政權的緊箍咒，民主派區議員各有選擇，有人如天田圍林進般決定涉險宣誓，亦有人掛冠而去，前公民黨橫頭磡區議員劉珈汶就表明，會在「最後一刻」辭職，「我真係睇唔到作為區議員呢個角色，宣咗誓之後仲可以點樣行落去。」
她不是沒有考慮過留任，「我想留低試條紅線，留低嘅話我就唔會收口」，正如時至今天，她的辦事處仍然掛著寫上「光時五缺」的鏡面牌匾，難以想像這種表態下她可以在宣誓過關，即使宣誓能過關亦隨時會被清算，「我試咗條紅線，然後坐咗入去，被剝奪政治權利終身，呢個當然唔值得。」
「不如我抽返出嚟做自由身，可以做更多我想做嘅…自己有明確目標留喺香港，繼續搵一個唔同角色喺陣營付出，我唔係辭職之後走，或者我放棄個陣營。」
劉珈汶
＊＊＊
劉珈汶的辦事處，座落橫頭磡村中央，在門外拍照僅幾分鐘，已經有數名居民路過，「你唔做嗱？」「唔捨得你呀！」劉珈汶就大聲回應，「係呀唔做啦。」
對她而言，要辭任區議員最難捨的是區內的街坊，上星期她開街站，派發口罩單張，單張正是向街坊公告她的辭職決定，「但街坊睇都未眕就捉住我隻手，眼濕濕話Carman好唔捨得你。」
「始終 19 年都講話，係我哋一齊打贏果場選舉…所以其實我最愧疚，係無辦法完成對佢哋 4 年嘅承諾。」但除此以外，她對區議員這個身份並沒多少留戀。年半區議員經歷，她強烈感覺到的是作為區議員的局限，例如她作為食環委員會副主席，推動做區內空氣污染研究，「就係想睇警察用催淚彈，對民居影響有幾大」，但被民政拒絕，之後她「退而求其次」，改做民生研究，例如電單車泊位、龍翔道噪音，政府都以部門有做研究拒絕，甚至過年有人在摩士公園放煙花，她打算去信海關詢問香港檢獲煙花數字，都被民政署留難，「同黃大仙無關，你唔問得。」
「咁去到呢個位，作為區議員仲可以做到啲咩?」
＊＊＊
民主派區議員面臨政府全面抵制是一，令劉珈汶面對更複雜狀況的，是她「不收口」的性格和進取的政治立場。
例如她的辦事處去年做過初選票站，《文匯報》指控她曾提供場地予「公民議政平台」籌委會開會，令她有兩個月薪津被民政總署扣起；例如今年 3 月，劉珈汶在議會貼上「欲加之罪 何患無辭」、「磊落做人 一生平安」的標語，被民政專員黃智華指控違反國安法，兩度拉隊離場，例如她在區議員會議悼念六四，DO再次離場。
她不會形容自己是被DQ「最危險」的一群，但隨著不少抗爭派和參與初選的民主派被捕或離港，「我前面啲人一個一個咁走緊，排落嚟咪到我，原來好多區議員同事眼中，其實我風險都幾高」，個人風險當然是她會評估的因素之一，但更令堅定她想法的是，是預期即使她宣誓可以過關，未來面對的處境只會更惡劣、空間更窄。
「宣誓前我同我的同事都會踩住界，喺區議會嘗試做一些政治表達，但好明顯宣誓後，我哋無辦法再在這個灰色地帶遊走。」若她選擇宣誓，為她監誓的預計會是民政事務局局長徐英偉，而徐英偉在區議會的代表，就是曾經指控劉珈文違反國安法的當區民政事務專員，「如果宣誓之後我照之前咁做，佢隨時有可能 DQ 我。」
＊＊＊
作為目前少數表態辭職的區議員，她亦有質疑過自己，是否不夠成熟，「所以唔識喺叫做處於弱勢去匍匐前行、韜光養晦、臥薪嘗膽」，所以她亦一再強調自己由衷尊敬留任的議員，因為他們未來面對的打壓只會更嚴重，但她思前想後，都覺得宣誓「過唔到自己嗰關。」
在她背後的「光時五缺」鏡面牌匾，本來旁邊還掛了一面「光時旗」，「一直無諗住拆」，但在國安法通過前，她收到「非常之大的壓力」，於是將旗幟拆走，「其實嗰時拆完我都好後悔，點解我會自己跟住咗政權條紅線嚟行?」
劉珈汶辦事處一角
而宣誓和拆光時旗不同的是，旗拆了就可以一次過規避風險，但區議員宣誓後，宣誓就成為她們頭上高懸的利刀，在餘下的任期政權隨時都可以用議席和薪津制約她們的一言一行，但控制這把刀的「紅線」，隨時、地、人飄移，實際的界限在那，根本沒有人說得準，要在宣誓後確保「安全」，非常困難，「如果唔係你不斷試、不斷縮…根本唔知可以縮到去邊，或者縮咗都無用。」
「呢個唔啱我性格。」
她亦設想過按自己的「人設」，宣誓後「唔收口」，不止是試紅線，而是以身「撞」紅線，「有啲區議員朋友就鬧我，你試咗又點？我試完條紅線之後，我就係咁先，以後咩都唔做得。」
「我喺場運動上嘅朋友，成日都話要死，都要死得有價值。」
而作為區議員撞紅線被DQ甚至入獄，當刻會有一定迴響，但不是她認為「有價值」的「死」法，「我係講緊為場運動、或者為香港可以做到嘅嘢。」
劉珈汶辦事處一角，黃大仙區議員在獅子山下合照
＊＊＊
所以她表明，離任後不會離開香港，而是在陣營中尋找身位繼續服務，做社區教育、民主運動相關記憶的活動等，「我無覺得我捨棄咗我個陣營」，只是她不想未來被區議員這個公職身份要面對的宣誓「綁死」，原本的地區工作，她亦有意繼續跟進，本身作為「黃區」的黃大仙，鄰近的區議員亦願意協助她推動地區政策。
「我當然會覺得麻煩咗佢哋。」但她不認為，這當中有「你哋努力、我走先」的心態，形容留任的人作為「包底」任重道遠，「收埋自己，繼續留喺度做公職，因為要保護返坐咗入去嘅人、被捕離開嘅人，補足佢哋工作。」相反，沒有公職的人，反而有可能在沒有包袱下走得更前，輕裝上陣，面踐對宣誓去留，民主派區議員不是分歧、分裂，更多的，是分工。
「19 年我同大家共同選擇去參選區議員，而家有一個轉捩點，大家重新排過自己角色，大家重新搵過個崗位，你打波都有唔同人企唔同位啦。」
劉珈汶
