政府計劃收緊公司查冊，將來公眾唔可以再查到公司董事嘅「受保護資料」，例如董事住址、身份證號碼。呢件事，應該係對新聞行業嘅致命打擊。咁大件事應該要有人講，仲要多啲人講。
或者有人會話：「而家又唔係唔俾你查，係查唔到董事地址同身份證咋嘛，有咩咁大影響？」當然，要攞回應或對質，第一時間梗係上 office 。但係留意返，有問題嘅公司，好多時 office 地址，都只係秘書公司嘅通訊地址，係唔會有人喺度架，呢個時候就只能透過董事地址等目標人物。
相比其他查冊系統，例如查車牌、地契，公司查冊可以話係調查報道，甚至日常新聞報道中最基本、最常用嘅工具。任何範疇嘅新聞，都有機會用到公司查冊，例子多到數唔哂：查圍標、各種商業騙案、利益衝突等等 ⋯ 往往都係透過公司查冊，揭發不同公司之間千絲萬縷嘅關係，好似發現幾間公司嘅董事都係報住同一個地址，然後順藤摸瓜，就查到一大抽野。大家不妨睇下過去各大新聞獎，有幾多得獎報道係透過公司查冊完成。
或者你又會話：「香港有得查算好喇，大陸乜都冇呀」。咁就錯了，大陸嘅公司查冊網，其實有系統好多，公司電話、股東關係、有冇涉及法庭案件都可以睇到：
https://www.tianyancha.com/ ｜ https://www.qcc.com/
我同意要保障私隱，但係如果連傳媒都唔俾查，公眾利益又有邊個保障？咩都唔公開當然最保障私隱，但同時保護埋一堆別有用心嘅人，冇傳媒監察，香港遲下會唔會變埋「真．罪犯天堂」？
原刊於作者 Facebook
