今日，四十七位手足被落案起訴國安法下顛覆國家政權罪 — 記誌住我哋走過左香港民主運動嘅序章，未來嘅路，我地要準備好更加堅毅行落去。
我唔需要再花時間去陳述、去批擊政府同警方嘅決定有幾無理有幾狂妄，呢個係香港人一早要認清嘅事實，亦係我哋決定得行追求民主呢條路，必定途經嘅挑戰。與其係度傷春悲秋，或者話「估唔到共產黨可以衰到咁」，不如今日，我想同大家傾下香港人面對未來漫長嘅黑暗時代，應有嘅心態。
佢哋四十七位嘅力量，從來唔來自佢哋自身，而黎自每一位為香港行過出黎嘅香港人。一位位「素人」，都不過至為平凡嘅香港人，不過係你同我身邊嘅同行兒女。政權迷信「拆大台」，繼續憑槍打出頭鳥嘅策略，以為鎖起四十七為民意代表，就可以令香港人放棄對民主自由嘅追求。但佢哋睇唔透嘅係，佢哋身上嘅力量，依然存續係每一個你我心中。只要我哋呢班係出面嘅人，心中信念依然不滅，任雨打任風吹，呢條未竟之路總會有香港人行落去。
此際我哋縱使迷茫，但迷茫之時，回望二零一九嘅浩瀚抗爭，我哋總會搵到啟示、搵到行落去嘅動力。二零一九年走上街頭，摒棄大台思維，就係出於明瞭「自己香港自己救」嘅覺悟。因為所謂民主，從來就指我哋就算要踏遍洪荒，就要於泥濘與崎嶇中，行出自己嘅一條路。民主運動，不因四十七人而生、亦不因四十七人而亡。反而，係四十七人被還押之際，我哋會更加睇清實象，睇清我哋無辦法奢求「政治領䄂」為我哋完成香港人呢條取西經之路，更加促使我哋接下時代嘅火炬，將漫長嘅抵抗，係每個人嘅個人層面延續。
張崑陽話「流亡係革自己的命」，而我相信，留係香港，亦係一場自己修行，一場係亂世中挎問自身信仰嘅修煉。
二零一九年，我哋向世界示範咩叫若水之志。而家，係我哋嘅時候用一生去證明，我哋做得到 — 抽刀斷水水更流。
走筆至此處，仲總會遇上一問題：「咁我應該做啲咩？咁你有咩高見？」
我嘅答案係：「先由唔再問呢一句開始。」
香港人嘅民主路上，唔會有指世明燈、亦唔會有民主方程式，有嘅，只係每人百折不撓嘅意志同「自己香港自己救」嘅決心。我哋唔可以再等待一種領䄂，等待一條康莊大道 — 我哋要執起鋤頭開墾，或者會開出一條絕路，即管回頭再出發；我哋或許會失足受傷，即管療癒後再走。但我哋唔可以再固守係原地，等待他人嘅救續。四十七人唔可以代我哋行呢條路，我亦唔可以。我可以做嘅只有陪伴，只有同大家一齊係每日嘅生活中修羅，去嘗試去碰壁去闖蕩。用兄弟爬山嘅精神，默默耕耘，直至我哋係應許之地重聚。
國安法甫面世之前，好多人已經提過，民主力量必定要低調化、地下化。中大學生會十二人會被打壓、初選四十七人會被捕，但四千中大學生、但二百萬香港人，依然可以存續。唔好諗點樣搵下一個領䄂，今晚就自己去諗，自己仲有咩可以做。只有真正明白呢點，香港人嘅民主路，先可以行到落去。
祈求領䄂代勞嘅話，228 就會係香港民主運動嘅終結。勇敢肩負自己嘅責任嘅話，228 就會係香港民主嘅開端。
避唔到，一齊捱，係亂世中修煉，係荒謬中磨練堅毅、係恐懼中建構希望。終有一日，我哋將在沒有黑暗的地方重聚。
作者 Facebook
