探訪的朋友常問我「有咩想同香港人講」。想起看新聞和解悶時見到感受到最強烈的是一種「究竟仲可以做咩」嘅無力感。雖然沒有很清晰明瞭的答案，但我想嘗試回答這個問題。
（作者 Facebook 專頁 admin 按：如希望看到阿藍的手稿全文，可以至 Patreon 觀看）
這個問題有兩個層次：行動上，看不到未來的具體方向；情緒上，無法排解絕望。而我一直認為，梳理前者，是克服後者最有效的方法。
在 DQ 後，2.28 前的半年，我也跟現在的大家一樣，每日活在身邊人不斷流亡、手足不斷被秋後入冊，日日都問自己究竟做緊乜鳩的狀態，但我仲未想到「仲有咩可以做」，反而每一日都忙到 hihi，仲另外有好多嘢排着想做（可惜而家已經做唔到 sad）。結合最新的發展，在此跟大家分享幾點想法。
① 不要被對家的 agenda setting 擾亂自己的節奏
通常「唔知可以做咩」有一句潛台詞，就係做咩都冇用。這個判斷很難避免受大環境影響，但個「大環境」中最主導輿論嘅議程，喺今時今日呢個被扭曲嘅輿論場之下，其實未必真係咁 matter。
整個三月，主導新聞議程的，是 3.11 決定，選舉改制：234 定 333、邊個坐篩選委員會、忠誠廢物大戰廢柴學者 bla bla bla……係呀，立法會玩撚完，建制派大撚哂啦，so?
走到這一步，不過是一條乾屍的蓋棺儀式而已，咪由得班忠誠的建制拗餐飽佢囉。
雖說七孔流血還七孔流血，死還死，但正常意義下的「選舉政治」這件事由 2016 年 8 月 5 號開始七孔流血，到 DQ6 開始肌肉壞死， 2020 年壽終正寢， 2021 正式出殯，佢喺運動中嘅重要性係一路減弱之中，經過 2019 ，去到 2020 已經成為服務場運動的「其中一條」戰線。不正正是因為選舉政治已經承載唔到香港人的反抗意志，令後者如海嘯一樣外溢，才會有 2019 的出現？
個根本性的改變唔係而家先發生（since 2016），而香港人亦唔係冇行動去對應呢個改變；無論佢而家吹到幾大、幾嚴重都好，都只係為一個本已死亡嘅制度蓋棺而已，唔係（至少唔係對民主派）出咗啲咩新招， 2.28 審判亦是同理： 47 人一齊受審固然震撼，但事實上，這 47 人失去政治空間、民主派的失語，遠非始於 1.06 吧？
在大政治範疇，香港很難免陷入一種「每當喺一個場域尋找到突破，政權就會將嗰個場域整個扼殺」的困局：新一代勢力有望在選舉中改朝換代，就出現 DQ；立法會有望過半，就成個立法會制度改哂佢；區議會奪得主導權，民政就靠 walk out，hold 撥款令其無法運作；既有法律、司法制度仍有空間為抗爭者爭取有利裁判，就直接頒布新法例、指定法官，改寫司法制度。
這個邏輯，並不限於對應民主派：已經有很多論者指出，今次選舉改制要整治的已非民主派，而是商界和鄉事。改革選委會，固然是要箝制立法會候選人，但同時亦是杜絕「曾俊華現象」（即一個不獲北京欽點的建制，可以透過動員民意對北京構成挑戰）再現。
給到今天仍在猶疑「後生仔是否去得太盡」的人：曾俊華不夠溫和嗎？直情是建制喇啵，現實就是，只要是有可能（注意，只是「可能」）掙脫政權掌握的社會力量，不論是建制抑或民主派，都要面對空間被徹底扼殺的命運；從另一個角度而言，就是這些制度的設計本身，政權一旦失去主導權，就無法在以政權可以接受的方式運作，這些空間過往未被撲殺，是因為他們未被視為「失控」。
若不是政權在 2019 年尾錯判民情，那一屆區議會被 DQ 的候選人會有那麼少嗎？民主派大勝會在可被預知嘅情況下被允許發生嗎？第一場大勝不論對哪一方面都是一個「意外」。正是為了杜絕這樣的「意外」（不論其發生概率如何地低），才會有不惜任何手段都要取消立法會選舉的做法。
當「任何有可能不受控」的力量都會成為打擊對象，「係咪去得太盡」、「如果點樣點樣少少，係咪就唔會咁」之說已無甚意義。事情已經非常清楚，走到這一步，只是時間問題：因為一個不斷發展的民主運動，是不可能永遠停留在「政權可控」的範圍，除非它以自身的發展為代價，自我設限 — 分別只在，這個過程會用多少時間、付上多少代價……
資料圖片，來源：Meckl Antal @ Unsplash
若說這是必然，咁「抗爭」究竟為乜？
在這個「必然」的軌跡中，我們能夠嘗試改變的，是這個過程的節奏（而節奏將會決定所付代價的多少），以及，維繫能夠容許「意外」孕育的土壤。
上述是我個人對形勢的判斷（去年在不同場合也講過很多），重點是，對形勢的判斷，往往會左右一個人對「未來」的投射：追求民主自由，情感驅動固然是一大重要部份，但若對問題的結構沒有自己的理解，面對政權鋪天蓋地的議程設置攻勢，難免會被 spin 到被說服現狀是絕望的。
大家不必全然認同我的判斷，但至少可以理解，為什麼我並不認為選舉改制是一個打擊。立法會／選舉政治的下場，2019 年已經寫下；運動的意義，亦遠遠不只取得一次半次立法會／任何選舉的勝利，而是一個真正自由、民主的香港。所以，因為最近的變化而感到冇力，我認為是莫名其妙的 = ] 甚至，呢個變化，幫場運動解決咗一啲之前一直解決唔到的爭拗，斷咗一條必然耗費大量甚至全部人力物力，但收效甚微的進路添。
3.11 立會改制的同時，政權的其他動作（如在教育界的清算，不斷擴大的資訊監控），對運動造成根本性傷害的可能性更大，但在思考如何對應這些具體問題之前，我又想把視角在往回拉一點。
香港民主運動不再以選舉政治作為主軸及主要動力來源，咁個方向應該係點？ 2019 年給了我們一個答案：共同體的建構。過去兩年，一個共同體作為一個概念，一份認同已經成形，這是毋庸置疑的，咁之後呢？係咪埋喺心底，佢就會自我實現呢？
呢個係一萬億嘅問題，我當然冇清晰嘅答案，但正如 Heyo 所言，「我只知道腳下係我起點」。以下，係一幅「邊爐救港」的藍圖。
② 共同體作為一個系統
（注：早排睇村上春樹《地下鐵事件》， 其中一位受訪者談東京整個社會應對突發情況的能力，用上了「共同體系統」一詞，容我在此挪用一下）
共同體如何從一個透過共同記憶與異象來維繫的，思想上的概念，深化為一個 functioning 的系統呢？或者你已經反緊白眼，心諗「係咪準備返兜 2015 年後雨傘嗰套深耕細作」。但現在的形勢已全然不同，曾經可以畀你深耕細作的條件很多都不再存在。然而，在公共領域大幅萎縮的當下，這個問題就更形重要。
街頭（作為共同體顯現的空間）、立法會（作為搶奪主導政治議程的機器）、區議會（作為全港性的地區實體網絡）、媒體與（曾經完全開放）的網絡（作為超越個人圈子與其他共同體成員互通的公共空間）一個接一個被扼殺， （公共領域）是否不復存在？
元旦時寫了篇文，大意是其實民主運動的資源沒有消失，人們想「做啲嘢」的熱心也沒有消失，但在資訊受限之下，散落的點無法連接起來：負面、消極的情緒會被放大，真正的事工必須自我隱匿，於是我們就無法在公共領域感知到「沒放棄的同路人仍然很多」的事實（正如我通常只會見到好多人問我做咩唔走 😮）
在政治空間仍相對開放時，很多人的「政治參與」都是一種完全脫離自己既有人際圈子的體驗（因為你很容易就可以在開放的社會，找到直接對應的同路人）。2019 年，一方面是 TG / 連登令這種以立場 / 技能對接的網絡發揮到極致；另一方面是各區行動現場以居住地為基礎建立的關係。
如果你仍在這樣的網絡中努力着，恭喜你！（可以慳啲時間不用看下文了）但據我所知，也有不少 2019 建立的網絡已經散迭。以下寫給還沒找到共同體系統入口的人。
資料圖片，來源：Chromatograph @ Unsplash
過去半年，我的觀察是這樣：民間仍有非常多的空間尚待開拓，有很多需求要人填補，與此同時，亦有近乎泛濫的資源、與極多日日惆悵「究竟可以做咩」的有心人。然而，正因為公共空間被打擊（最明顯是傑斯案一嘢打沉了「眾籌」），需求與資源無法對應，然後大家就一齊喺度抱頭「唉仲可以點」。
舉幾個例子說明這種不對應：蕭生年賺千萬，但《誌》就窮到 office 都要分租出去；排隊買團結糕點課金畀「石牆花」的人龍延綿幾個輕鐵站，但仍有未定罪的手足要逐堂逐堂律師費煩惱；願意在區議會街站停留，寫「親愛的手足，雖然我不知道你是誰……」的市民接近無限多，但國安法被捕的美國隊長二代寫信出來，說最近已經冇乜人去探佢。試過有熱心市民收集聖誕咭給手足，但不知道懲教轉了規矩限咭，得物無所用。
與其等待他人整合需求開召喚 post，其實有沒有辦法，自己把這些需求找出來？其實唔難，但非常花心力。以下用支援手足舉兩個例子。
i) 真係會有手足寫信出嚟，話唔太想收到無定向式「親愛的手足，雖然我不認識你……但長夜將盡！一位香港人上」信件。但這類信，石牆花收超多……
將對「在囚手足」的理解停駐在一個「整體」，address 一個無面目的人，表達 unspecific 的支持，與認真求一個筆友，同一個有名有姓有經歷有脾氣的在囚者認識並建立關係，完全是兩個層次的 commitment，能夠帶給手足的慰藉也不同。
ii) 正如任何「做得起」的行動都會成為打壓目標（送車師都會畀人指控襲警），目前的在囚支援系統也不會自有永有。捐錢給 612 、課金撐星火的同時，大家有沒有試過從自己身邊出發尋找自己身邊的手足呢？岑生成日話「而家個個 35 or below 嘅人，都一定識人係畀人拉過」，雖不中亦不遠矣。其實會唔會，你每年過年先見一次嘅姨甥世姪， 或者有人生日先約出嚟嘅小同中同大同，就是背負着控罪，或在身體 / 心理仍有後遺的手足？
（見過一啲靠 612 畀 N 個專科醫藥費，但父母完全唔知嘅小朋友…… 612 冇錢究竟點算？）
講的不只是金援，還有時間心力。譬如支援在囚者，就是非常繁重的工作：地點偏遠交通費時、規矩繁多，排探訪次序、安排傳訊、物資已經做死人，如果只有家屬去做，簡直是對家屬的折磨。如果你身邊也有手足，除咗寫信 / 探，會唔會有空間承擔呢啲工作，令家屬可以輕鬆啲？
冇錯，正正就係呢啲最瑣碎、最花心力（甚至要動真感情），會牽涉各種人事上的衝突與麻煩與溝通上的反反覆覆，最令人覺得卻步嘅事，至為重要。而喺過程當中，真正去認識、取信他人，令「同路人」與「手足」之間的關係，轉為真正人與人之間的關係。
支援手足只是一個例子。再畀多個：隨着區議員面臨 DQ（或好似運亨咁已經議員都冇埋），他們在社區的經營，是否就要無以為繼？據我所知，由幾位中學生創辦的地區報《沙燕》亦因為 DQ 危機面臨停刊。在這些組織出 post 求救之前，你會否已可以找到他們？自己幫唔到，是否可以從自己的圈子中，找到對應的資源？
唔舉例啦，大家自己發掘、自己搵啊喂。點樣尋找呢啲「需求」「資源」就係透過大家去拓闊自己嘅圈子，去深化自己與身邊人嘅聯繫。簡單嚟講，就係打多啲邊爐 ^^
（講樣無聊但 relevant 嘅嘢畀大家聽：我同鄺葆賢係因為大家都係鏡粉先突然熟咗 = ] 但係真係因為咁樣 fd 咗，促成咗某啲事情嘅發生 😏）
如果每一個人都咁樣去做，共同體就唔再係一齊帶豬嘴企喺街頭先感受到，唔再係見到手足慘慘豬新聞好嬲好嬲先感受到嘅概念，而係一個實體化、tangible 嘅，即使公共空間如何弱化都能夠自我發展同深化嘅系統。
當你搵到呢個共同體系統嘅入口，你就會發現，真係一地都係嘢冇人做，而原來有好多人，一直 keep 住做緊啲好 exciting 好勁嘅嘢，甚至促成咗一啲真實而重大嘅改變，只係一直都靜靜雞。
這不就是 2019 的狀態嗎？ 2019 最重要的遺產，就係大家都識得自己尋找位置，不問回報地共同促成事情發生。的確，比起那時候，公共空間萎縮了很多，但正因如此，這份精神更加要強化才對。
③ 正視自己的付出，做多少少就夠
睇解悶見到好多人話「除咗去西九，都唔知可以點」me 表示黑人問號……
有幾耐冇試過聚到咁 Q 多人？有幾耐冇聽到嗰八隻字，連紫旗都出埋？其實最重大嘅意義唔係點樣支持到被告，而係喺限聚令 / 非法集結 / 襲警嘅威脅之下，加上根本唔知其他人會唔會出嘅情況下，你 3 月 1 號仍然晨咁早爬起身鼓起勇氣出咗嚟，好勁喎呢件事。（主要係起到身嗰下勁）
非關畫面靚唔靚，非關被告係咪真係見到，而係，你用行動證明咗，你仍然有行動嘅意志 — 而最後又真係多人到咁。
環境改變了，何謂「做咗嘢」的準則已經不同，（正如「朔夜」自言不如上莊勇敢，會有老鬼表示慚愧一樣）。我觀察到並擔憂的是，近來每當討論「仲可以做咩」，舉的例子往往是寫信 / 探訪 / 追車，彷彿只有直接關乎手足 / 政治犯的事才是在直接地回應運動，其他都是無關 / 離場。但，絕對不是這樣的啊。手足當然需要支援，但運動（如果我們同意當前最重要的是共同體的建構）更加需要持續的發展和外擴。
之前看到一篇新聞，是天水連線的林進，在辦事處外搞舊物 upcycle，被房署諸多留難，與房署周旋的故事。自己本身是一個暴動罪被告，戰友伍健偉又面對唔知坐幾多年的國安法控罪，而林進仍在搞社區衣櫃。按一兩年前的標準，大家或會覺得違和到爆，但今天的我讀到，只覺得林進好撚勁。勁在，面對咁埋身嘅壓迫同情緒壓力，佢仲可以維持一個仲做到嘢嘅狀態，仲要係最濕星最麻煩嘅嘢，真心 respect……（香港政府前線官僚喺呢個世界上最煩嘅生物之一）
圖片來源：瑞華 – 林進 Lam Chun Facebook 專頁
岑生最鍾意傾極權之下的行動形態究竟係點。或者真正有用嘅事，絕不只最直接的寫信、旁聽、追車。當我們說維繫「共同體」究竟是為了什麼？就是在維繫可以孕育出「意外」的土壤啊。沒有人知道下一個「意外」會是什麼（西九外的紫旗可能是一個小小的意外），因此，任何方向的拓展都重要。不論是在自己擅長的學術領域為茶餐廳文化立說（你知唔知茶餐廳英文係咩？係 caacaanteng 啊 =] ），還是將試當真製成圖文寄給手足（喂我又要），都不可或缺 —（btw，大家課咗喱騷未？）
這樣的擴展舉步維艱，以非常瑣碎的方式匍匐前行，亦往往伴隨不合比例的巨大代價。
（我還是好奇，西九外那幾十張 599G，邊個畀？）
用「擴展」這個字，因為「香港」的現狀並不是 static，而是在外力圍堵不斷收窄、不斷迫近、一個不斷縮小的狀態，因此我不會用攻、守去理解，而是一個進進退退不斷變化的過程 — 任何阻緩圍堵步伐的嘗試，都是一種逆向的擴展。
在自己的位置上面對不為人道的兩難，將會是很多港人將要長期面對的狀態。在國家機器最前沿的末節與之對抗，必定非常磨人、事倍功半；有沒有在自己的位置上守住自己的信念，不放棄任何反抗 / 不妥協的空間，是自己要獨自面對的事，而這樣的掙扎，將越來越難被看見；但逐次爭取到的一寸地、一點人心，如果在公共領域消失之下仍能積存下來，就會有機會孕育出下一次意外。
（反之，如果你晚晚寫信畀手足寫到三點，但日間因為 lunch hour 太短餐廳太多人而為方便裝咗安心出行，咁……雖然都唔會有人知，但……就有啲本末倒置囉）
所以，我們每一個人都可以做，同時也必須做的事，說來很簡單：照顧好自己，確保自己始終維持在「人 OK，可以做多少少」的狀態。這樣，在遇到兩難時，就有精神力量不因疲乏而妥協；一旦見到隙縫，也有能量去抓住再往外擴（哪怕只有一點點）的機會。
照顧好自己，係每一個人嘅基本責任嚟。
i) 「不要心存僥倖」非常重要。與其盲信自己有機會大步攬過而「搏一舖」然後被打入深淵繼而崩潰，不如認清風險同承受能力再量力而為，唔好用幾年前嘅判斷（「未審先囚咁唔公平，點解會咁」）去研判今日嘅情勢，對政權嘅殘忍要有心理準備。呢啲唔係「悲觀」或「自暴自棄」，而係對自己嘅情緒狀態負責：次次都搏，覺得會有奇蹟，然後次次都冇，你可以承受打擊幾多次而唔崩潰、唔放棄？倒不如先將期望調整至合乎今日香港現實嘅水平。
自己嘅風險如是，他人的亦一樣， 2.26 獲通知要提早報到後，很多人跟我說「你一定會冇事㗎！」我都唔知點覆好……這句話不會安慰到我，反而令我很擔心：原來真係咁多人對個現況嘅理解係咁不符實際……
同理，唔好覺得「我係小薯啫」、「幾時輪到我畀人搞」而輕忽 info security。記住只要你一部電話 compromised，你電話入面所有 contacts 都即時有風險。輪唔到你，yea maybe，但唔好累到人是基本盤。
ii) 「OK，可以做多少少」重點不在「OK」，而在「做多少少」。見字飲水坐直，隊酒打機睇造星，如果只是作為 distraction，somehow 只係承載住你一啲負面情緒，等你有返少少心力去做返啲嘢，好難單憑呢啲嘢就抵消到黑暗本身；個人覺得，真正、甚至唯一可以抵消黑暗嘅療癒，就係「啊，今日做到少少嘢」的感覺。
而要做到多少少的前提，就係要有一個符合實況，而唔係不自覺地被對家 spin 到過分負面的現況評估；量力而為，認清自己的能力同侷限，不會對自己有過份的期望或要求；再搵出真正切合共同體所需，因而亦更易見到成效的「任務」。
唔使一步登天，而係先確保自己 OK，然後慢慢要求自己做多少少，唔妥協多少少 — 少少就夠 — 得咗，再做多少少。如果你連「OK」個位都未去到，咁用盡一切方法慢慢令自己 OK 返（包括完全放 pae），就係你要做多嗰少少。
運動中的創傷，只能在運動中療癒（吳叡人，20??）；而如何用自己的方式去延續運動，每個人都要自己去尋找答案。
其實，都係一啲大家喺 2019 年已經見過、明過，甚至做過的事，此文權當一個 reminder。而我知道，這篇文的意義不僅在內容，更在於一個已經坐緊監甚至唔知究竟要坐幾耐嘅人，可以用咁嘅 tone（仲要越寫越跳脫）寫篇咁嘅文；睇新聞，如果我只是一個讀者，一定會覺得 47 人還押就等於人生完結、無事可為（保到嗰啲就社會性死亡）好慘好慘咁，1/47 的何桂藍表示：喵？[1]
這就算是我應付完、令自己 OK 咗「坐監」這個現況之後，做多少少的嘗試吧。
See~？望落好難，但原來都唔係做唔到的啊。
容我引周永康 15 號的一段話，為這篇文章作結。感謝勵叔選了這段話放進報道，才讓我看到。雖然隔着好遠好遠，但 me 同 Alex 都在思考同樣的事。
「我相信，人間革命就是重塑人和人之間的關係，而我和大家不能放棄這一點……作為重新起步的基礎，及當初參與政治和民主運動的根據，這一點就是希望所在。」
作者 Facebook 圖片
嘩認真嘢終於寫完喇！！！手都跛，獎勵自己寫返幾段鳩嘢～
[1] 寫這個喵字時我才想起來一件事……話說去年初，向聰請教他在 2016 年以來的經歷，在 TG 幾百幾百字的來回。聰總結說，要 assume 這個位置， 就是要在風浪之中，成為眾人的「錨」。可是美東和歐洲有時差，導致我剛爬起來睡眼惺鬆時看到 msg，一不小心看成「在風浪中，成為眾人的貓」。
……這是什麼 cls 的預言
（下面是鏡仔時段）
PS 這篇文差不多寫完，才第一次收到大家給我的信（係 3 月 4-8 號的），感謝～不過好多人寫姜濤，仲要同我講 loop 咗〈蒙著嘴〉幾耐……啊啊啊啊啊？要嚴正聲明：我鍾意嗰個係 A.N.S.O.N. L.O. 盧.瀚.霆.啊（好啦 Jer 同 Jeremy 都 ok）個個鏡仔我都睇嘅，但請大家不用特地寫姜 b 啲嘢畀我了……同埋我明明都有唱〈一所〉，但據啲信講最後洗版的是〈蒙〉？在懲教所內仍然非常關心教主 view 數的神徒表示啊，蝕咗……
不過，嗯，都明嘅，可能嗰幾日的情緒，大家的確更需要〈蒙〉，〈一所〉的狀態實在是有點太 chur 難以進入吧。〈一所〉都係留返畀自己算了 -.-” sad
PPS 我！聽！咗！柳！應！廷！嘅！新！歌！啦！ ❤️❤️❤️
話說收音機三個禮拜都未到（屌），但係 20 號嘅 RTHK2（呢度 morning call 係 RTHK2）晨早六點三竟然播咗一首好澎湃（即係好撚嘈）同埋不停 we 哇鬼叫嘅歌，仲要嗰日唔知點解開得特別大聲。同倉所有人都被炸醒屌哂鬼，但我一聽到把人聲就開心到爆咗 ❤️
嘩唔講仲以為 MUSE 做咩出廣東歌～mm7～萬人出走化腐為不朽～
不過原來柳兒已經連新 solo 都出埋，醒起自己上一篇文仲講緊〈時光邊緣的人〉，好柒啊……不過這種資訊落差，也是這些獄中書可讀元素的一部份吧。
BTW，Jer、姜、團歌撞埋一齊是什麼暗黑兵法？
呢兩日終於攞到收音機，聽咗〈Master Class〉，就嚟聽到團歌，好期待啊啊啊～不過好擔心 MV 嘅大頭同 solo 分佈……話說演唱會竟然喺九展，咁保守㗎，即係就算未入嚟，本身喺出面都唔使旨意搶到飛啦，心理即刻平衡咗 = ] 大家搶飛加油啦～
PPPS 話說我而家身處嘅地方，係隨處可見「LOCKED」的字眼，而我嗰個唔知裝咩嘅腦嘅第一反應係呀， locker 果然周圍都係……
作者 Facebook / Patreon
