明日大嶼終極地圖解鎖

0
180

兩件事:今星期五政府會偷襲向立法會拎 5.5 億擱置左成年既人工島工程研究撥款,加埋近日中央全速研究借桂山島既計劃,成個香港終極地圖迷霧就基本上已完全解鎖。

話說近月提出借個桂山島俾你起公屋,聽落都覺得好唔 make sense,因為桂山島個位風高浪急,缺水缺電,市區搭高速船都要成近一個鐘,孤島上面起公屋俾 10 萬人住形同規劃自殺,貌似純粹滿足一種帝國自 high 既低檔次地理想像。

然後近日建制規劃界、文匯報同民建聯都開始吹風話可搬走埋香港個碼頭。原來講下講下,變左係想食左香港個碼頭去珠海再騰空葵涌啲地起樓,先至係潛台詞。

呢個「重置碼頭方案」似曾相識,重記得林鄭在 2018-19 年自編自導既土地大辯論裡面,突然空穴來風殺出兩個選項係叫「重置葵青貨櫃碼頭」同「發展葵青貨櫃碼頭上蓋」,個陣好多行家都搲爆頭唔知邊個既主意。

如果根據番近年頻頻北上既前規劃署長凌嘉勤近日既講法,話自己 2018 年已曾在內地學術會議提到桂山島填海初議,亦即係承認左個搬碼頭去桂山島個原意,一早喺大陸已經成形,只係香港人被規劃左蒙在鼓裡,俾人塞左入自己把口都唔知。

再睇番個陣董伯伯個「團結香港基金」,個陣提出新玫瑰園計劃填愈 2000 公頃人工島,亦都講到明建議「長洲以南」重置碼頭同棕地,只不過冇講清楚其實可以南到去邊,隨後林鄭立即未諮詢完就 all-in 明日大嶼。依家睇番,即係好可能佢地一早收到風要在港推銷定個計劃,卒之到今日真係放左入去明日大嶼 5.5 億個工程研究撥款,會研究埋「長洲以南」既長遠發展。

醒少少,借個島俾你搬走個葵涌貨櫃碼頭,即係話定俾你聽好有可能會有額外幾千億基建道路網連起哂啲珠海外島同香港,唔係啲貨點再經陸路運到市區?

正路黎講,估計佢地諗緊既係一整個大灣區港珠島嶼橋網,坐底會有港珠澳駁落桂山島,到人工島建成後就駁埋條橋落附近啲外島。其實根本都唔知目前海洋地質起唔起到,不過你會搵到 19 年年底珠海已經開波去桂山島做定地質海洋調查,起到分分鐘又係另一個上萬億超支開庫大計,到時邊個最開心?

同埋香港連個碼頭產業都落入左珠海境內,所有貨物進出清關都分分鐘俾人操控埋,雖然話香港已經冇左自治地位,未來將會再死左兩錢重。

所以萬億人工島點解咁多人反對,係因為佢一定係個唔只萬億既無底深潭中途站。島嶼上以智慧乜乜之名既監控基建、水電路橋高鐵、工程超支、人禍災難既隱藏成本,香港港官一齊死幾世都陪唔起,虧啲經濟佬、地產佬同啲學者重作文咁作啲唔同理由盲撐人工島,以上既成本提都唔敢提,重係度推銷有助解決房屋問題云云。

咁計落,其實最驚都唔係反正預左一無所有既年青人,而係成千上萬靠政府養老金既退休/等退休既公務員,睇住依家政府毫無制約既財政紀律,點計都計唔到條數,分分鐘都俾人提早拎走埋。

對好多已經歷過咁多既香港人黎講,其實萬億財政一鋪清袋同碼頭送中已經開始有啲無感,背後順便搞埋中港人口融合亦都可以預想,成件事好似已經太 logical。但仍然會令我覺得討厭既,係有班人可以當香港任何一片地方都好似白紙一張,目空一切鐘意點劃就點劃,重愈劃愈過分,然後重包裝話係份大禮送俾你,基本上破壞哂成個大嶼山南部既本土勝景同自然風貌之餘,為左佢地既意志同利益,將我地好 L 鐘意既香港變左個嘔心惡俗之地。

搭飛機望到香港周圍島不成島既畫面,諗起都覺得傷心,一諗到咁就好想不如俾啲掙扎,一齊贏番啲錢分左佢就最好。

作者 Facebook