因 DQ 風聲觸發民主派區議員辭職潮，全港逾半議席已懸空。荃灣區議會今（20 日）下午開大會，但本來 16 個民主派區議員，已有 10 人辭職，僅餘 6 名民主派仍在議會佔多數，主席陳琬琛會議甫開始時發言，指今日座位對面特別冷清，「我喺度要祝福所有區議員，及在座咁多位都身體健康」，各與會區議員都懷著忐忑心情，但相信荃灣區區議員每次開會均「做足功課同準備」，相信仍然是十分有效率的區議會。
荃灣區議會今日召開大會，路政署、警務署、食環署等政府部門均有派員出席，但 10 名已辭職民主派區議員的座位及名牌均已移走，陳琬琛指今日會議將討論慶祝荃灣衛星城市 60 周年撥款，他特別關注區內舊樓、劏房問題，「政治一日嫌長，在座唔知仲有幾多位將來繼續坐喺度，我拜托各位區議員，如果繼續留喺議會，多啲關心，尤其為基層如劏房戶工作，留多啲資源畀佢哋，為基層工作，希望大家幫幫手。」
民主派在 2019 年區議會選舉大勝，該區 19 個直選議席，民主派贏得 16 個，建制派連同兩個當然議員只有 4 席，惟經過連日辭職潮，至今僅餘 6 名民主派區議員仍在任，包括主席陳琬琛（梨木樹東）、副主席李洪波（荃灣中心）、林錫添（楊屋道）、劉卓裕（愉景）、陸靈中（荃灣南）、黃家華（梨木樹西）。
