警方今天拘捕民主黨立法會議員林卓廷等 13 人，指控他們涉嫌 7.21 元朗站干犯暴動等罪，新界北總區刑事總部高級警司陳天柱見記者時指，一名「穿黃色背心的女子」離開收費區後遇襲，令事態急劇惡化，當日現場有直播片段，「只影單方面行為」、「旁述令人誤會是所謂無差別襲擊」。
《立場新聞》是事發初段，唯一在現場直播的傳媒機構，以下為《立場新聞》記者於 7.21 當晚於元朗站直播襲擊事件時的旁述報道文字紀錄，由記者目擊過程到警察到場，關鍵的首 25 分鐘的文字全記錄，方便讀者重溫關鍵時刻，是非黑白，自有公論。
在這半小時中，《立場新聞》記者並無提及「無差別襲擊」字眼；記者步出收費區時，並無挑釁行為或語言；而影片所見，記者當時有拍攝閘內市民的行為。
（直播地點：元朗站大堂入閘後，直播開始頭一分鐘，見欄杆外有一群白衣人，有人拿住棍狀物體，站內的市民穿著不同顏色衣物，部分拿住雨傘，雙方隔欄對峙，有時以手上物件對打，或互擲雜物。）
[0000] 《立場新聞》記者：大家好……呢度係……各位《立場新聞》既觀眾，呢度係元朗西鐵站，而家記者喺元朗西鐵站付費既入閘區裡面，大家見到入閘區外面，係非常多著白衫同埋拎住棍同埋 唔同形式武器既人，咁啱啱……其實喺…大家而家見到欄杆位置係企滿咗市民，咁但係因為出面白衫的人不住攞住木棍去攻擊而家入面的市民，所以大家係退後咗。
（衝突稍為平息）
[0100] 《立場新聞》記者：重覆一次，呢度係元朗西鐵站既現場，啱啱記者喺元朗西鐵站的女廁，見到有一位中年既女士，佢已經，話畀一啲白衫既男人，圍住打咗兩至三下，佢既頭而家流血不止，啱啱記者喺廁所見到有呢個情況。而喺出面係真係見到好多拎住木棍，同埋唔同材質既棍棒既，著住白色衫的市民，不斷向閘入面叫囂。
（記者鏡頭隨住白衣人行走路線，來到近入閘機）
[0144] 《立場新聞》記者：有人打開咗封住閘機內外既門，但係暫時未有人入來，大家見到鏡頭方向，好多人，拎住棍狀物體，而啱啱佢哋喺而家鏡頭影住呢啲玻璃欄杆外面，向住企喺入面既市民揮棍……而家喺入閘區入面的市民，亦都係有向外面投掟水樽。而啱啱《立場新聞》記者喺另一邊既時候……
（有白衣人打開閘門進入收費區）
[0234] 《立場新聞》記者：而家開始有白衫市民越過閘機行入嚟……立法會議員林卓庭已經到咗現場，但係佢哋（白衣人）而家暫時退咗出去，同埋係閂埋咗閘機（閘門）。而家見到西鐵站閘機裡面，有大批市民滯留咗喺呢度。重複一次，啱啱《立場新聞》既記者，喺元朗西鐵站既女廁，見到一位女傷者，女傷者向《立場新聞》記者表示，佢係因為喺元朗落車既時候，見到有年輕人畀著住白衫……（現場嘈吵）…………sorry，由頭講過……
[0326] 《立場新聞》記者：見到有人士係拎住木棍向閘內叫囂，但佢哋暫時無採取任何行動話要入來，佢哋不斷要求入面既市民而家要行出閘機外面……而家氣氛係僵持。啱啱個live可能開得太慢，大家而家鏡頭呢啲玻璃欄杆，其實係出現咗有欄杆外的市民，攞住木棍打欄杆入面市民的狀況。
（白衣人再次行近閘機，叫人「出嚟」，畫面見林卓庭及一群市民在閘機內，部分人舉傘）
[0420] 《立場新聞》記者：呢度係元朗西鐵站近 Yoho Mall 出口既閘機入面既位置，大家而家見到林卓庭議員係企喺示威者最前方的位置，控制場面，但係到而家都仲未見到任何警員，因為《立場新聞》記者喺大概十五分鐘之前，喺女廁見到一位頭部流血的傷者，當時 first-aider 幫佢做急救時，已經話報咗警，但係到而家，視線範圍唔見有任何警員……另外有一啲圍觀既市民啦……
[0512]（旁白停頓，畫面見白衣人一方與站內人士互相叫囂、僵持）
[0530] 《立場新聞》記者：呢啲喺閘機外的市民，極多都係拎住木棍……
（直播聲音聽到閘內市民高呼「黑社會，唔好走」）
[0550] 《立場新聞》記者：有救護員到咗現場……
（畫面再見到衝突，白衣人一方有人隔住欄杆揮棍，閘內有人舉傘擋住，有人掟雜物）
[0638] 《立場新聞》記者：重複，呢度係元朗西鐵站現場，啱啱大家喺畫面都見到，閘機外面有大批著住白衫的男士，佢哋拎住木棍同竹枝，不斷向閘入面既民眾襲擊，不斷攞木棍扑入嚟，同埋掟嘢，閘機入面的範圍亦都有……（畫面見記者所站位置有人襲擊，有人舉傘擋住，拍攝位置略為後退）
[0728]（整群白衣人亦後退，離開鏡頭範圍，記者步出閘機，在閘機附近位置繼續拍攝）
[0745]（突然一名穿粉紅色裇衫市民衝前，用類似竹枝物體襲擊閘內市民，再轉頭用類似竹枝襲擊在旁拍攝的《立場新聞》記者，記者呼叫倒地。）
[0759]（記者起來繼續拍攝，畫面見三數名白衣人圍住一名黑衣人用雜物毆打，隨後亦見有三數名白衣人再圍住一黑衣人拳打腳踢。）
[0825] （記者一聲呼叫，鏡頭再次倒地，並有多次拍打聲，有人叫「Ｘ你老母，記者……」；記者再高呼，有人大喊「唔好打」、「唔好打記者」，鏡頭廿多秒後再舉起，見周圍是白衣人。）
[0857]（鏡頭搖晃中再次舉起，見一男子鼻孔位置有血。）
[0949]（鏡頭見有人在閘內噴射滅火劑或噴水，地面濕滑，有人滑倒。）
[1022]（鏡頭移向有白裙女士倒地位置，救護員救護中）
[1030] 《立場新聞》記者：呢度係《立場新聞》既直播，啱啱記者被著住白衫既市民，係圍埋一齊，係圍毆，《立場新聞》既記者同另一位行家，畀大批白衫既民眾圍住我哋兩個，係圍毆，記者而家手指受咗傷，但……記者而家手指係傷咗，腫得非常利害，所以……但係我見到喺閘機入面既情況，非常之可怕，大批市民係退咗去月台上面……
（畫面見白衣人湧進閘內）
[1125] 《立場新聞》記者：大批市民退咗上月台上面，大批人有啲爬咗喺樓梯上面……
（鏡頭見記者手部傷勢）
[1135] 《立場新聞》記者：大家見到呢個係記者頭先畀佢哋襲擊既傷勢……成隻手好多手指都係流緊血既……我相信身上有其他地方係有傷……暫時唔影住，影番閘機既情況先。
（記者再步入閘內，鏡頭見大群白衣人，有白衣人走上月台）
[1205] 《立場新聞》記者：大家見到佢哋一路追住市民，追到上月台，我哋搵另一個方位，係可以入到月台，望一望上面情況……啱啱係有大批市民，唔係淨係記者一個，如果有睇直播，會見到有女士，成個暈低咗喺地下，另外頭先有另一位行家……（鏡頭搖晃，記者聲音似對路人說：小朋友千祈唔好過去，打緊人，似是路人問：「邊個打邊個」，記者聲音：「盡快離開呢度」；似是途人問：「差人呢？」，記者聲音：「報咗警，完全無嚟過，快啲離開，你哋快啲離開，有小朋友快啲離開……走啦走啦，快啲離開。」）
[1300] 《立場新聞》記者：現場仲係有市民唔知道情況，帶埋小朋友嚟西鐵站，情況非常之危險，到而家警察都係無嚟過，
[1330] 《立場新聞》記者：啱啱係聽到，有市民係攞住木棍，係指嚇記者……
（鏡頭叫有男人拿住條狀物體指罵記者並跨欄追趕，記者急步跑上扶手電梯，到達上層月台）
[1347] 《立場新聞》記者： 佢哋暫時無追到上嚟……（喘氣聲）但係記者剛喺一邊上到嚟，另一邊……有人向住入咗閘，上咗列車的市民，都不斷攞木棍同雪糕筒，係打緊喺列車入面既市民。
（鏡頭見白衣人把其他人推在地上毆打，鏡頭忽明忽暗）
[1425] 《立場新聞》記者：唔好意思，記者部機可能頭先跌過嚟……我哋不斷行近呢一邊……但係呢架港鐵列車係未閂門，所以離開唔到，現場月台係有好多其他市民，到而家都係仲未見到有任何警員，甚至任何既車站職員維持秩序，係見唔到，但記者喺半粒鐘之前， 見到傷者既時候，根據 first-aider 既講法，係已經報咗警，而家亦唔知道元朗站外面究竟係乜嘢情況。
[1524] 《立場新聞》記者：記者而家係 zoom 緊近鏡，所以距離呢一班著白衫的人大概有五十米既範圍，但佢哋不斷向緊呢個方向接近，同埋不斷打緊車廂入面的市民……係越打越前，上到嚟的白衫人士越來越多，佢哋係逐個車門入去打……大家見到呢架列車入面，男女老少有好多完全唔同既市民，有啲白衫有啲黑衫，有啲真係未必有去遊行既市民嚟既，喺現場極少、極少既市民有防具……有啲白色衫的民眾，係自己件衫都染血……
（月台上仍然滿是白衣人，鏡頭近處有一位黑衣人，向遠處白衣人高舉雙手）
[1642] 《立場新聞》記者：大家見到有一位民眾……
（畫面見有一白衣人拿著類似竹枝走近記者，鏡頭搖晃走避）
[1652] 《立場新聞》記者：啱啱見到白衫人，喺另一條電梯上面衝上嚟，即刻追住市民……
（記者進入車廂，再到月台）
[1720] 《立場新聞》記者：記者的傷勢，到而家仲係流緊血，啱啱頭先……大家見到現場，有小朋友，有家長仲係帶著小朋友，情況非常之危險，但到而家仲係一個警員都見唔到，啱啱見到而家影住既呢條電梯，突然間有大批白衫既人衝咗上嚟，佢哋一度喺月台周圍走，我哋喺車廂入面，大家見到，遠處其實係已經有啲白衫既人衝咗入嚟車廂度打緊人……係啦，我客觀事實到講係打緊人。
（遠處仍見白衣人）
[1816] 《立場新聞》記者：記者係會喺安全距離，觀察住個情況，似乎有大批市民，包括有女士係頂住咗，外面不斷有白衫市民，係不斷指嚇市民，叫佢哋唔好影相，現場啱啱樓下，有見到其他行家，樓上呢度，頭先都係見到一位行家啫。
（鏡頭繼續見到白衣人聚集月台遠處）
[1913] 《立場新聞》記者：情況好危險啦，啱啱真係見到帶住小朋友既……帶住小朋友既家長都仲喺架車上面，離開緊……好嘞，而家架車係會開既，相信……車門而家已經關上咗……我哋遠處係見到白衫的群眾係拍手歡呼，但車門隨即又開番……
（月台廣播，謂列車將不停元朗站）
[2020] 《立場新聞》記者：我哋見到車門，其實一直都係閂唔到，相信同前面呢一班白色衫既人，佢哋仍然係不斷咁樣，阻塞緊個車門係有關係……你哋可能聽唔到，其實係佢哋拍掌歡呼緊，而家車門啱啱關上咗。入面係有非常之多的市民，但係暫時唔知道架車開唔開到……仍然不斷有市民上緊嚟……而家車門又開番，即刻白衫既人趨近又再向佢哋叫囂……同埋啱啱記者係見到佢哋向車門入面投擲一啲物件，仲見到好多帶住小朋友……
（鏡頭搖晃）
[2128] 《立場新聞》記者：啱啱見到帶著小朋友既人士，所以記者係勸佢哋離開先，而家都係離遠咁樣影住，好嘞，見到大批白衫人士，喺對面架車，車門關上之後，係大批一齊落緊電梯。
[2150] 《立場新聞》記者：真係唔好意思，因為記者隻手受咗傷，唔係好方便行到去最前，但係都影住而家情況先。對面呢架列車，阻礙咗大概五至十分鐘之後呢，成功咁樣開出咗。
（鏡頭見白衣人離開月台回到大堂）
[2210] 《立場新聞》記者：所有既，拎住一啲武器，包括木棍等等既白衫人，而家係落咗去車站大堂。重覆啦，呢度係元朗站，見到呢班白衫人係離開緊，離開緊月台既範圍，但係唔知道佢哋會唔會離開元朗站……啱啱澄清番，其實報警呢樣嘢，係記者啱啱嚟到元朗站，即係三十分鐘前，喺大堂廁所見到有傷者既時候呢，啲 first-aider 向記者轉達，話已經報咗警既。而家見到白衫人係散去緊，暫時西鐵站月台情況呢，暫時係安全既，即係都唔係想點樣，向大家交代番，啱啱記者喺車站大堂的閘機外面，同另一位男姓、第二間報館既行家，係一齊畀呢一班著住白衫既人士用唔同的棍棒襲擊，果位行家傷得比較嚴重，成個口係爆晒血，記者雙手……
（周圍尚有人叫囂，鏡頭向大堂移動）
[2413] 《立場新聞》記者：我哋見到救護員，相信係救治緊廁所既傷者同其他既傷者。
[2433] 《立場新聞》記者：嘿，啱啱見到，閘外面有警察到場嘞，見到有戴住防暴頭盔既警察到場了，現場著白衫既人士，幾乎已經全部散去咗……
（直播繼續三十多分鐘，記錄了市民不滿警察太遲到場的爭論。）
