全國人大常委會喺8月11日決定現屆立法會繼續履職不少於一年之後，非建制派竟然為留唔留任嘅問題出現爭拗。先有本土派嘅梁晃維主張總辭，然後又有朱凱迪同陳志全企出來，表態反對留任，結果民主黨決定拎「民意」做擋箭牌，話要委託有公信力嘅機構進行民調，來決定佢哋留唔留任喎。
好笑嘅係，民主黨話要搞民調無耐，「香港民意研究所」就公布咗最新嘅網上調查同電話抽樣調查結果。網上調查結果顯示，只有 20% 自稱「民主派」嘅支持者支持留任，63% 反對。電話調查方面，支持留任嘅市民比例為 37% ，反對則有 41% ，表面上差距唔大，但喺自稱「民主派」支持者當中，只有 19％ 支持留任， 61％ 則反對留任。
呢一個民調結果，就搞到有意留任嘅主流泛民好尷尬嘞！如果只係網上調查反對多於贊成，佢哋仲可以話調查唔係隨機抽樣，或者有政團喺網上發功，動員支持者喺網上投票，作為佢哋唔接受結果嘅理由。不過，呢次係連隨機抽樣嘅電話民調，受訪嘅泛民支持者當中，都係反對留任佔多，而且同網上調查數字接近，你話有心留任嘅主流泛民點算好呢？
答案就係：佢哋決定「搬龍門」。話說民主黨早前同香港民意研究所開會，決定佢哋搞嘅民調採用所謂嘅「雙門檻」機制，即係剔除答「無意見」嘅人之後，整體受訪者有過半支持或反對，或者民主派受訪者有超過三分二人支持或反對，鴿記就會跟從有關結果。
之但係，歷屆民主黨議員當選，票源明明係來自泛民支持者，但係呢個所謂「雙門檻」，竟然唔係泛民支持者過半，條題如果又係問「支唔支持全體議員留任」的話，建制派受訪者實贊成㗎？民主黨用呢條數來決定留唔留任，對泛民支持者來講，真係仲有說服力咩？
更加令人好奇嘅係：主流泛民搞到今日咁核突，究竟係為乜呢？泛民之前明明話過，立法會延任一年，係違反《基本法》，同埋剝奪選民恆常選舉權㗎嘛？既然泛民都講到咁啦，民調又反對佢哋留任居多，仲邊有繼續留低嘅理由啫？如果做議員係無人工嘅，佢哋喺總辭嘅問題上，仲會唔會猶豫不決呢？呢個問題，明眼人已經心知肚明。
