唔知由幾時開始，亦唔知係乜嘢原因，總之每逢農曆新年，港府都會派人去車公廟求籤。印象當中，最初係民政事務局局長去求籤嘅，之後因為眾所周知嘅原因，變咗係鄉議局主席去求籤，今年亦唔例外，而今年劉業強為香港求得嘅籤，係第 45 號中籤，籤文為：「下手須教一著先，世情局面苦徒然；積薪歷火非無事，識者能知火未燃」。
求籤過後，又必然有一群政客稿佬 KOL ，化身為廟祝解籤。雖然作為唯物主義者，本來就從來唔相信求籤嘅，但係見到有啲人拎住籤文中嘅「積薪歷火」抽水，話香港現時仲有一啲「積薪」(積累落嚟嘅柴)，所以應該防範於未燃，然後又按照自己嘅立場，去解所謂嘅「積薪」係乜，於是忍唔住講兩句。
唔少人都提到，「積薪歷火」實為「積薪厝火」，出自賈誼《治安策》中嘅「夫抱火厝之積薪之下而寢其上，火未及燃，因謂之安，方今之勢，何以異此」，比喻隱患未除，應該防範於未燃。之但係賈誼當時認為天下未除嘅「積薪」，究竟又係啲乜呢？好多人就因為冇睇過《治安策》原文，亦唔知當時嘅寫作背景，於是亂解一通。
其實，《治安策》所謂嘅「積薪」，一係指國內諸侯尾大不掉，綱常秩序並未確立，二係指國外匈奴強盛，漢朝為求和平於是採取懷柔之策。至於原因，係漢高祖創立漢朝之初，為咗撫恤手下大搞分封，又封多個同姓諸侯作為屏障，只係去到後來，諸侯造反之事不斷發生。
先有韓王信暗通匈奴入侵，又有韓信、英布、盧綰謀反事敗；到咗漢文帝在位期間，又有同姓諸侯嘅淮南王劉長同濟北王劉興居謀反事敗。喺內亂不斷嘅情況之下，漢代初年只好向匈奴採取和親同懷柔政策，但係匈奴依然係經常侵犯邊境。
於是乎，賈誼喺《治安策》入面重提上述亂事，以此證明無論同姓抑或係異姓諸侯都有問題(疏者必危，親者必亂)，要解決諸侯威脅中央嘅安全，就必須削弱諸侯嘅權力(眾建諸侯而少其力)，使到諸侯「力少則易使以義，國小則亡邪心」，咁先可以做到「海內之勢如身之使臂，臂之使指，莫不制從，諸侯之君不敢有異心，輻湊並進而歸命天子」。
另一方面，賈誼又主張對外放棄綏靖懷柔政策，認為「勢既卑辱，而旤不息，長此安窮」，對內則重建等級分明的綱常倫理秩序，「立君臣，等上下」，「禮不及庶人，刑不至大夫」，使社會「父子有禮，六親有紀」，同時積極培育儲君，「夫教得而左右正，則太子正矣，太子正而天下定矣」。
所以真係唔明，啲泛民 KOL 睇完籤文之後，點解仲會以為車公係幫自己講說話。係啊，籤文係話「積薪歷火非無事」啊，但係將「積薪厝火」放返喺香港，分明就係叫中央「眾建諸侯而少其力」，強化對港全面管治權，同時推行國民教育，培育治港班子啦！唔通係繼續任得班泛民利用「高度自治」嘅空間繼續搞事咩？瞓醒未啊你哋！
