被保安局以國安法凍結 1,800 萬元資產的《蘋果日報》，已陷入生死存亡關頭。壹傳媒董事會周五將商討是否停刊，公司內部流傳周六為最後見報日。《9 點半蘋果新聞報道》率先與讀者告別，今晚（21 日）播出最後一集。節目的「開山元老」、蘋果動新聞前總採訪主任李家聰雖然早前已離職，但今日特意回到蘋果日報大樓，製作最後一集新聞報道。
《蘋果》面臨停運，他深感唏噓，慨歎本地難再尋找如此空間。對於新聞同業，他寄語：「不論你從事咩傳媒，每個人都有自己一個底線。只要堅持大家做好人做好事，覺得你係左中右傳媒都冇問題，希望行家堅守自己底線。」
離職後仍堅持製作最後一集
晚上 9 時半，蘋果日報大樓一樓的錄影廠內，主播坐在綠幕前。「三、二、一」的倒數聲響起，主播正襟危坐，對著鏡頭讀出今日的各條新聞。
這是「9 點半蘋果新聞報道」的最終回。
據了解，動新聞大部分剪片員工辭職，部門難以運作，令「9 點半蘋果新聞報道」走到盡頭。
人手不足下，原本已離職的李家聰，特意回蘋果日報大樓監督製作。他完成節目後接受《立場新聞》訪問時形容，雖然已經離職，但眼見公司風雨飄搖，特意回來製作最後一集新聞報道，「今日公司好動盪，都想返嚟照顧同事、睇吓啲同事，有冇咩可以幫手」、「靚靚仔仔咁樣做最後一晚」。
今日的「9 點半蘋果新聞報道」，有逾 36,000 人同時在 YouTube 上觀看直播，過程中不斷有人「課金」支持。李家聰坦言，未試過如此多人收看，「其實好感動，過去一年做嘅嘢冇白費」。
李家聰
踩過界電視式報道 原為抗衡赤化電視台
回想「9 點半蘋果新聞報道」在去年 10 月啟播，器材、人手都相當緊拙：「我哋呢度係個山寨廠，可能大家見到個廠都幾似樣，但其實係超級山寨，開頭仲要用 notebook 做 panel。真正電視出身嘅人，呢間公司唔多，都係靠大家一人走多步。」
《蘋果日報》踩過界製作電視台模式的新聞報道，原意是為了抗衡電視台赤化後的單一聲音。李家聰憶述：「當初係試嘅，試試下又成功，都係多得連登仔，舊年八月話個個電視台都赤化，不如蘋果開個 newscast，老細又問可唔可以試下，我又成日都想搞，一拍即合……由訓練主播、置裝、化妝、搭廠，一個月內已經成就呢件事。」
「有線變天，now有變動，好多年輕人覺得，不如蘋果搞個 news cast……呢個真係成就時代嘅任務。」
被問到若香港人失去《蘋果日報》有何損失，「冇咗蘋果，係冇咗把聲音……冇咗蘋果好悲情，對香港都幾慘，可能睇返（讀者留言）你就會明白」。
節目壽終正寢，李家聰嘆道：「心酸、唔捨得。我諗我係蘋果 12 年，做到最後，成就一啲嘢野，就係呢個 930 cast……我好慶幸呢個 project 能夠成為蘋果一部分。你見今日預告會最終回，網上好多人 share。」
「人生至此，夫復何求。」
僅任兩次主播即告別 謝馨怡：好想享受最後一次 930
今晚的「9 點半蘋果新聞報道」由記者謝馨怡擔任主播，她昨日才首度擔任該節目主播一職。
「第二次做就已經係最後一次，心情都好複雜。」謝馨怡在節目後向《立場新聞》嘆道。
「On Cast 前幾分鐘開始，開始倒數，當然都好緊張……好想享受最後一次咁樣同觀眾見面，好想享受最後一次 930。」
在節目尾聲，謝馨怡指「9 點半蘋果新聞報道」由去年10 月 5 日啟播，感謝觀眾 260 晚以來的支持。她又特別寄語其他傳媒要緊守崗位，「希望即使少咗我哋呢個平台，香港嘅新聞工作者，都可以緊守崗位，捍衛真相」。
節目最後的結語是由幕後工作人員撰寫，而謝馨怡特別加添了一句對新聞同行的寄語。她事後解釋：「因為我覺得《蘋果》今次呢件事，其實某程度上對新聞自由都係一種…都會損害新聞自由，所以都好希望可以有呢個機會，同其他的行家講，希望大家一起加油努力。」
謝馨怡
謝馨怡：大家緊守崗位已足夠
入職僅數月， 謝馨怡感受到《蘋果》給予記者的自由度，「我點樣寫，我點樣 present 個故仔，老細、採主唔會審查你…《蘋果》呢個地方喺香港呢一行係好難得嘅…知道來緊會冇依間公司，冇依份報紙，都覺得係好可惜好遺憾，香港就會冇呢個空間去做新聞」。
對於《蘋果》高層被捕，謝馨怡深受衝擊，「佢哋係因為新聞、因為依間報館而畀人拉，畀人告，對我來講係一個衝擊，亦都會有好嬲的感覺」。但她仍然相信，報道真相無罪：「即係去到今日最後一個 Cast，最後幾個工作日，我都覺得冇做錯嘢，都係覺得做緊記者應有的本份。」
「希望《蘋果》同事無論之後去到邊都平平安安，知道過去依段時間大家都做得辛苦，大家都抵受好多外界的壓力，但都希望佢哋走之後，都可以有好的出路，最緊要係平安。我覺得，行家都希望大家可以一齊努力，正如剛才喺 cast 講，希望大家緊守崗位，已經好足夠了。」
