「中國基督教播道會同福堂」的銅鑼灣分堂，在六月有 40 名少年導師聯署聲明請辭，然而同福堂的回應是一度取消他們有份負責的少年崇拜。
Ivan、Chloe、Yuki、阿詩四人都是參與聯署的少年導師，三人都自幼從父母而信教，而 Ivan 則是追隨女友入教會。
本來融洽的教會，隨著傘運以降的世變漸生隔閡。既始於意見之分；亦起於世代之爭。
Ivan 直言：「其實張力一直存在，問題係點應對。我地唔想裂痕繼續裂落去，所以想行出一步修補裂痕。前提係先要認清有裂痕存在，好多教會當冇事發生，我地唔甘心。」
Chloe 補充：「我地對教會冇任何怨恨，仍然有盼望。我地由細事奉，好愛依個地方，好愛我地牧養過嘅人。」因為對教會的愛，他們不想擇木另投。
去年反送中運動令分歧益顯，不少教友冀望教會既為此發聲，也提供支援。「教會嘅位置正正喺維園附近，好適合提供協助，但教會閂埋度門。」
他們嘗向高層請益，迄無回音。
Ivan 解釋：「教會一直以嚟嘅取態，就係唔對政治作任何表態。教會就係教會，社會就是社會，唔 take side。」他們透露高層的牧者曾在內部以「命定」回應爭論。
可是對年輕人而言，「唔 take side」正正是一個問題，「啱就啱，錯就錯。任何人受傷都應該得到教會保護。」
Chloe 說：「我地明白唔同人有唔同立場，但耶穌教我地保護弱小、幫有需要嘅人，唔駛分立場。」
何況「唔 take side」只是表面上的說辭。教會內有牧者嘗言，即使和平抗爭者奉行非暴力路線，也是在「掩護」激進抗爭者。他們難以苟同。
然而另一邊廂，同情運動的牧者則在壓力下難以發聲。「如果教會真係中立，唔同政見都應該包容到。但事實係教會入面，某一邊政見可以好自由咁宣揚；另一邊意見就好少機會可以表達。」據知曾有牧者受抨擊甚至被問話。
Ivan 解釋：「係咪見到唔公義都默不作聲？我地嘗試過更溫文嘅方法，只係得到冷處理，當冇事發生。」因此才會請辭爭取溝通，「唔係剩係要佢地明白我地，我地都希望明白佢地。」
阿詩一臉真誠：「我地學嘅都係教會所教，我地對教會依然有信心。但教會做出嚟嘅同我地所受嘅教導有少少相違背。」
Yuki 提到「好撒瑪利亞人」的故事。「而家教會係咪有光，係咪有盼望？問心我而家唔係好覺。教會要做番聖經嘅教導同榜樣。」
儘管他們辭任職務，但不會離開教會。「我地唔係分裂教會，而係修補裂痕。」
「我地唔係想要脅或者挑戰，我地係想一齊行落去。」
筆者曾在循道衛理堂旁聽講座。位處遊行要道的循道衛理堂，每逢遊行都會開放會堂，早已廣為遠播。當晚的發言者有羅秉祥教授、郭偉聯教授、王少勇牧師，他們的取向亦人所共知。
在問答環節，一名上年紀的信徒提出一條親建制的問題，與現場主流迥然有別。他可能從小已加入循道衛理堂，儘管去到社運年代，立場與會眾愈來愈遠，但依然留下來。
教會內的信眾難免有不同政見，總不成一言不合便見異思遷，也必須要顧及比較保守的老信徒，由是「復和」便成為教會反覆強調。縱使筆者不是基督徒，也學會了「復和」一詞。但「復和」會否淪為表面上的和諧；實際上的噤聲？
聽聞筆者提到的故事，阿詩對循道衛理堂那位老教友感同身受。「佢依然勇於發聲，因為佢依然對教會有愛有盼望，相信依個地方。我地都一樣。」
Ivan 接腔：「我地唔係要將間教會變黃討好我地，而係每一種顏色都可以存在，可以互相了解。教會唔一定要支持我地，但起碼要嘗試理解，接受我地喺入面。」
他不想基督徒予人感覺馴服政權，明哲保身。「教會對政治不瞅不睬係最方便，但唔係最好嘅方法。教會之所以係教會，而唔係其他組織，因為我地有聖經。聖經就係我地嘅宗旨，聖經點講我地咪點做。」
聲明的迴響超乎他們所想，他們的友儕既有教內與教外人，前者或傷感於衝突，或欣慰終有人表態。後者則驚奇「耶撚」並非活在教堂的圍牆內，「好多人對基督徒嘅感覺，就係佢地講好多道理，但冇做出嚟。」
他們教導的年輕組員都看到聲明。「佢地好認真睇，知道我地深思熟慮，嘗試過其他方法先寫聲明。亦都明白我地真係出於愛，唔係想拆毀教會。愛唔係唔出聲就係好，坦誠嘅溝通都係愛，係愛依個地方先會講出嚟。」
最後筆者問他們有沒有信心能夠復和？
Chloe 說：「如果您依一刻覺得好絕望，好唔開心好徬徨。我地好想同您講：我地一齊行落去。」
Ivan 說：「我地除咗係教徒亦都係香港人。雖然有唔同信仰，依然想聯繫到大家。」
Yuki 說：「我地當然有盼望。正因為盼望會有轉變所以先會咁做。」
阿詩說：「我地更大嘅盼望係香港重光。」
後記
幾經波折，同福堂終應允與一眾少年導師對話，惜因疫情延擱。
作者 Facebook
