每一次去聽審，特別係「裁決定罪」嘅庭。當你聽到法官結案陳詞最後嘅一句「罪名不成立」。呢五個字都會有一種莫名嘅感動和痛心欣慰，然後庭上傳來一片掌聲，手足同親友悲喜交集，甚至哭得崩潰。呢個畫面同感覺係好複雜，好難用文字形容。
大概好似當你發現自己喺街上跌咗個銀包（自由），你嘅內心非常惶恐焦急，然後突然有人原封不動將銀包還返俾你，然後你會好慶幸好感恩，原來呢個世界好似仲有好人，呢個社會並唔係大家想像中咁差。
但原來事實係殘酷嘅，呢個銀包本身就屬於你，你拎得返個銀包，其實只係一件好基本不過嘅事。然後，你發現個銀包根本唔係自己整趺，原來係有個賊搶走咗，而個賊發現銀包入邊原來係冇錢，所以先勉強裝作好人願意歸還。
在香港人心中，沒有任何手足是有罪的，因為該懺悔的是政權，歷史必判我們無罪。而我始終認為「罪名不成立」，並唔係因為法治「有險可守」，更加唔係政府想放生你。今時今日司法系統受到行政機關嚴重干預，根本無法彰顯公義，而「罪名不成立」只係個政權未夠證據而鋤你唔死，更加遑論「法治未死」。
當大家會為一個正確嘅裁決，一句合理嘅「罪名不成立」都顯得份外難能可貴、痛心欣慰嘅時候，我們才發現彼此所承受的，是如此的痛；所希冀的，卻是如此的天真。
如果嘗試以文字描述這種複雜的心情，大概係從心底裡，感覺似是鬆了一口氣，原本應有的自由，突然失而復得。由原先沉重、忐忑、不安，轉化成悸動、痛心、欣慰而結合起來嘅心情。
或許庭上嘅被告同你互不相識，甚至素未謀面，但你仍然會感同身受，感受到手足嘅痛苦，體會到有一種切膚之痛（社工的詞意是同理心）。這種感受是彼此相連的，是命運共同體一起承受苦難嘅想像。
每一名手足都係為香港嘅抗爭運動而無條件付出，他們背負著重擔、承受審訊壓力、面對政治檢控，走著動盪人生。而我時常想如果每一名手足嘅審訊，都有大家同等嘅關注同熱情，呢個社會同其他上庭嘅手足們，就唔會充斥無力感，彼此之間覺得冷漠同灰心。
對旁聽師來說，「罪名不成立」可能只係剎那嘅感動同安慰，大家會為手足「逃過一劫」而感到慶幸，而我們只是抽少少時間，前往法庭旁聽聲援，其實只係一個很廉價嘅支持。
每一單政治檢控，短則一年，長則數年，而手足所面對嘅長期審訊壓力，這漫長的折磨又係何等的痛苦同煎熬？實在不足為外人所道。
我很希望「撐手足，撐到底！」這不只是一句口號，更要彼此真正實踐。
作者 Facebook
