行勻全世界，有邊間大公司，好多員工涉嫌影人裙底、經營賭檔、非禮、強姦、偷竊、販毒、虐待、粗暴對待客戶、唔按照員工手册辦事，部份人贓並獲，而大公司CEO、Deputy CEO、COO、CMO、CTO、CXO及眾多部門主管，仲大搖大擺，驚都未過，擘大口講大話，奢言好注重員工質素，以服務客戶為主。
任憑一件醜聞，都會引起關公災難，令公司疲於奔命，甚至倒閉，但大公司一唔搵窿捐，二唔檢討員工質素因乜事咁渣，三唔集體引咎辭職，而集團董事長仲連聲讚好，加薪之餘，翻新俱樂部，大量購置最新設備任員工自己舞，令員工無後顧之憂，淨係出街畀人唾駡，神台貓屎，神憎鬼厭，唾面自乾，好工我自為之。
商業世界，管理階層同埋集團董事局一干人等，按道理畀人炒咗好耐，大公司不特止死唔去，仲加官進爵，薪高糧準。哎吔吔，天下之大，無奇不有，你何曾見過？吾生也晚，但我見過，真係發夢見過。
作者facebook
