留低與唔留低，我絕對認同要齊上齊落丶保持團結。
不過，首先要搞清楚一樣嘢，所謂「齊上齊落」，唔一定係「抗爭牌妥協然後一齊留低」，why not係「傳統泛民妥協然後一齊唔留低」？
入正題，首先我哋要認清事實。
其實而家已經唔存在「守住分組點票直選議席過半數就可以阻止乜乜法案通過」丶唔存在「留低關鍵三份一就可以阻止D乜乜惡法乜乜關鍵法案通過」丶亦都唔存在「就算唔夠票我哋都可以拉布」、或者「透過用議會程序就可以守住乜乜乜」…..
如果仲有人咁樣去同選民講丶甚至作為支持續任嘅理據，佢根本唔係講緊事實。
事實係：
如果要通過一般議案，立法會過半數議席支持就可以，建制派一早就過半數，一開番立法會，一讀二讀三讀限時討論丶剪布丶抬走晒你哋丶表決通過，完；
若果有啲議案要分組點票表決，Sorry DQ咗咁多人之後泛民喺直選議席都已經少過半數（就算仲有過半數，政府搵個藉口DQ你一兩個咁咪又係建制贏……），一讀二讀三讀限時討論丶剪布丶抬走晒你哋丶表決通過，完；
如果要政改或者立23條，你以為我哋有關鍵三份一就守得住？同樣，搵個藉口DQ你一兩個議員，你就冇咗關鍵三份一，一讀二讀三讀限時討論丶剪布丶抬走晒你哋丶表決通過，完！
大家明白未？
因為呢個議會已經唔係曾鈺成做主席嗰個年代嘅議會，而家仲有啲所謂關鍵議案未失守，並唔係因為我哋擁有幾多議席所以守得住，而係背後有政治能量令中共未落手，呢啲政治能量主要係來自美國方面嘅壓力，其次亦有可能係來自中共或港共內部嘅分歧…….
暑假前最後一次立法會大會，明日大嶼第一批撥款通過唔到，主因一定唔係因為你泛民守得住（並非冒犯泛民，我感謝佢哋嘅努力），而係建制冇夾硬通過咋！佢哋而家要夾硬通過一啲嘢有幾難？（大家唔通睇唔出？）
即係話，自從有咗剪布、DQ、人大釋法丶搶主席台等等茅招之後，呢個立法會已經唔跟原有嘅設定同規矩，基本上係冇遊戲規則，純粹睇政治能量嘅角力。若果中共政治能量未夠，咁建制派就暫時唔夾硬嚟，否則佢要夾硬通過啲乜根本就冇難度，你有幾多議席根本就影響唔到中共喺香港立法會嘅實際操作，因為戰場係喺中美兩國嗰張大枱，香港立法會呢張細枱嘅情況只係兩國戰況嘅投射。
留低喺議會，議員可以幫香港人發聲？
其實你唔喺議會裏面都可以發聲。你睇吓周庭喺日本嘅影響力丶黃之鋒喺歐洲嘅影響力丶攬炒爸喺國際嘅影響力，就知道要發揮影響力根本同佢喺唔喺議會冇關，甚至喺議會裏面嘅掣肘比喺出面嘅人仲要多，至少你要怕國安法、又要怕俾人DQ……….
留低，僅有嘅用途，係議員同埋議員助理嘅薪金可以作為支援抗爭者嘅資源（假設啲議員捐出嚟），同埋僅餘某啲議員先至有嘅特殊權力…….
「咁全部唔入番去又有乜用？」
不如我哋首先講吓點解中共咁想泛民留低。
如果泛民留低，中共就可以喺中美角力失利嘅時候，順水推舟俾泛民成功守住法案（其實係中共選擇唔夾硬通過法案），嚟保存中共嘅面子。
全部唔入返去，其實係以退為進。
試想像反對派全部唔續任，將啲議席俾哂你共產黨，你夠薑就即刻立23條（你大我呀？）！中共如果真係敢立，咁攬炒戰術就成功，因為美國一定郁佢；但係，如果佢唔敢，咁我哋就知道中共嘅底牌喺邊喥！原來激嬲共產黨，佢都唔敢郁你！
其實，中共郁唔郁你，從來都唔係睇你有冇激嬲佢，係睇佢郁完你之後佢有冇着數、同埋佢承唔承受得起郁你嘅後果。
而家，中共拋咗個「續任」波落嚟，反對派就即刻進退兩難；其實我哋應該以退為進，拋番個「通過法案」波比佢，咁，進退兩難嘅就係中共。
咁你話「全部唔入番去」有冇用？
「咁你究竟支持定反對留低？」
我傾向反對留低，但係喺呢件事上面，其實我冇強烈立場，因為留唔留低，只係我哋選擇究竟揭唔揭中共隻底牌嚟睇，睇咗，會影響到中共嘅面子，唔睇，我哋就可以攞議員同議助啲資源；但係無論留唔留低，都唔會對中港甚至中美嘅實際角力有關鍵性嘅影響。
我只係想強調幾點：
1.齊上齊落，但係唔好攞「齊上齊落」呢四隻字就認定一定係抗爭派要退後少少就番溫和派，因為「齊上齊落」都可以係你溫和派睇住「齊上齊落」份上行前少少就返抗爭派！（鑊鑊都要我地含淚丶大局為重乜乜乜，你溫和派搵返次以大局為重含番次唔得嘅？）
2. 問多大家一個問題，如果一年之後，疫情又未穩定丶而中美仍然角力中，然後中共又叫你續多年，咁到時已經續任咗一年嘅反對派可以點駐腳？
3. 我認同要有民意授權！啱啱完成任期嘅議員，上次選舉選民俾你嘅民意授權只係去到今年九月，做唔做多年，要睇有冇新嘅民意授權，否則你同人大政協有乜分別？民意授權最好就係公投丶或者至少要有有公信力嘅民調。
4.如果有民意授權，留低定唔留低我都支持。不過我希望各位同路人認清形勢，各位同路嘅政治人物亦都有責任解釋清楚成件事嘅真正利弊俾香港人聽，而唔係用啲籠統嘅概念，例如「留低就又可以守護乜乜乜」丶「留低就可以守住關鍵三份一乜乜乜」呢啲假象去作為游說選民支持你續任嘅理據，然後到時守唔到又永續悲情！（其實中共要夾硬嚟，立法會根本就一定守唔到，唔該早啲話俾市民知，唔好令市民仲有不切實際嘅政治幻想。）
5.好多人會問：「唔入去嘅下一步係乜？」，我想話：依家唔係喺盛世做城市規劃，起完公路網下一步係起公屋同學校…….而家係打仗、係搏奕！仲要係同中共博弈！如果我吓吓答到你下一步係乜，你估中共會唔會唔識點應對？打仗不嬲都係定咗大戰略（我哋嘅大戰略就係攬炒），然後就見招拆招丶因時制宜。
6.如果大家仲係十五十六，我會問吓大家：以往抗爭嘅方式有晒下一步，咁又點？最後咪又係俾人喺議會抬哂出去然後夾硬通過晒啲嘢！上年攻緊入立法會嗰陣，好多人都話「唔好激嬲共產黨」、「唔好攻入去」丶「攻咗入去中共就屠城」丶「攻咗入去下一步係乜先」乜乜乜…….然後班細路睬你都傻，拉走咗梁耀忠條廢柴，然後真係攻咗入去，說好的屠城呢？但係，《逃犯條例》就真係因為班細路攻咗入去，暫緩咗，呢個係事實！中共用《國安法》代替《逃犯條例》？已經係之後三四步棋嘅事啦，咪再見招拆招囉！所以，如果你仲十五十六，我會話，信班後生！
簡單總結：
認清事實，放棄政治幻想，再由人民決定去定留，齊上齊落。
