呢張相，係民主派初選居前列嘅十六名「抗爭派」候選人記者會尾聲時影，喺口罩下難得展露笑容。
可能會覺得溫馨，可能會感到團結，但係我感到嘅係悲涼。
諗起四個字：含笑就義。
今時今日，行出嚟打正「抗爭派」嘅名號選立法會議員其實同送頭無乜分別，每個人都知道，佢哋面對嘅係整個黨國機器無遠弗屆、或明或暗嘅打壓。
喺香港人忙緊申請 BNO、賣樓套現、海外置業、搞緊移民嘅同時，有一班人企出嚟衝向政治漩渦嘅中心。
當中唔係個個都係黃之鋒、一舉手一投足一條 Tweet 都會引起各國關注嘅政治人物；有更多嘅係無名無姓嘅後生仔，就算有一日佢哋被消失、被滅聲，都唔會引起國際反嚮，即使喺香港引發嘅話題可能只會維持一兩日。
但係每一個人同樣有血有肉有家人，跟你同我一樣擁有自己嘅生活，家中有兩老每日提心吊膽，有另一半睡不安寢，有隻貓主子每日等緊佢哋返去服侍……當佢哋走上呢條路出嚟參選之時，可能就同平安喜樂、歲月靜好嘅日子永遠訣別。
如果咁係食人血饅頭，請講嘅人隨便起筷。
行出嚟，得一個原因：佢哋真係好撚鍾意香港。
#我自橫刀向天笑
#去留肝膽兩崑崙
（標題為編輯所擬）
作者 Facebook
