香港返祖時代

0
35

其他國家有民主,中國有中國式民主,立法會監察政府的功能被閹割,只宜閹人入局,官員與議員以後齊齊食皇糧再散盡幾輩香港人積累的財政儲備,不斷做超大白象工程向北送金,以後本地的醫療、社福服務、教育會如何?好在香港人一早比人洗腦,上唔到樓因為你去得旅行多,做人係要靠自己,你無飯食、無工開、入醫院瞓走廊床位關政府乜事者?英殖時代都係咁啦。

肺炎疫情下平民四人限聚、黑社會卻在元朗國百人賀壽,被蘋果日報踢爆,警方才在三日後略為掃蕩調查酒樓,睇吓有無人留低啲飯聚證據,無事嘅,話哂都係721的拍膊頭兄弟,加上近年大量警員監守自盜、仔女藏毒不提告、散仔康樂會收千萬無名氏捐款無人過問,整隊警隊又可以加入大灣區新社團,以後社團對社團同撈同煲,更加合作無間,在明在暗都有人照應,一切回到 ICAC 成立之前。

未審先坐剝奪人權又有乜驚奇?中國人幾千年牢獄文化,未審先關押、屈打成招係傳統,人權係西方國家產物,而家回歸做中國人,生活當然要中國化,香港人要識歷史,中國自古都有司法公正的代表人物,你未聽過包青天咩?中國唯一,大家都引以為傲。

香港倒退返祖,如花今日上來陽間搵十二少,應該唔會大太陌生,政府貪腐,警隊係有牌爛仔,撐政府的人係特權階級,賣身的阿姑當然識走位,遊走於有勢力人士之間,肯定會發過豬頭,仲駛乜搵負心的十二少?

发表评论